Կիմ Չեն Ընը հայտնել է` որ դեպքում Հյուսիսային Կորեան միջուկային զենք կօգտագործի

Հյուսիսային Կորեայի առաջնորդ Կիմ Չեն Ընը վստահեցրել է, որ Փհենյանը «առանց վարանելու» կօգտագործի բոլոր տեսակի հարձակողական զենքերը, եթե Հարավային Կորեան և Միացյալ Նահանգները փորձեն օգտագործել զինված ուժերը՝ խախտելու Հյուսիսային Կորեայի ինքնիշխանությունը, հայտնում է Կորեայի Կենտրոնական լրատվական գործակալությունը:

«Եթե թշնամիները անտեսեն մեր կրկնվող նախազգուշացումները՝ ևս մեկ քայլ առաջ կանեն՝ փորձելով օգտագործել զինված ուժերը՝ խախտելու Հանրապետության ինքնիշխանությունը, մենք չենք վարանի օգտագործել բոլոր հարձակողական ուժերը՝ ներառյալ միջուկային զենքը», - ասել է Կիմ Չեն Ընը:

Հաղորդվում է, որ Հյուսիսային Կորեայի առաջնորդը չորեքշաբթի այցելել է Կորեայի ժողովրդական բանակի հատուկ նշանակության ուժերի ուսումնական բազա՝ դիտելու ուսումնավարժությունը:

Իր ելույթում պետության ղեկավարը հիշեցրել է, որ ԿԺԴՀ-ն միջուկային պետություն է, և «ռազմական բախման» դեպքում «Սեուլի և Կորեայի Հանրապետության գոյությունն անհնարին կլինի»։ Նա ընդգծել է, որ դա «ինչ-որ հռետորական սպառնալիք չէ»։

Նրա խոսքով, «տարածաշրջանում անվտանգությունն ու խաղաղությունը խախտող ուժերը» Հարավային Կորեան և ԱՄՆ-ն են։