Իսրայելական հարվածների հետևանքով ԻՀՊԿ գեներալ Էսմայիլ Քաանին անհետացել է․ NYT

Լիբանանյան լրատվամիջոցները հետաքրքրվում են՝ ո՞ւր է կորել Իսլամական հեղափոխության պահապանների կորպուսի հրամանատար Էսմայիլ Քաանին։ Հայտնի է, որ նա ժամանել էր Լիբանան։ Սակայն իսրայելական հարձակումից հետո նրանից ոչ մի տեղեկություն չկա։

Այս մասին կիրակի՝ հոկտեմբերի 6-ի առավոտյան, հայտնել է The New York Times-ը։ 67-ամյա Քաանին իր պաշտոնում նշանակվել է 2020 թվականին՝ Բաղդադում ԻՀՊԿ-ի նախկին ղեկավար Ղասեմ Սոլեյմանիի սպանությունից հետո։ Նա երկար տարիներ եղել է Սոլեյմանիի տեղակալը և նույնիսկ ներառվել է ԱՄՆ ֆինանսների նախարարության պատժամիջոցների ցուցակում՝ ահաբեկչության մեջ ներգրավվածության համար։ Թեհրանում կառավարության երեք անանուն աղբյուրներ հայտնել են, որ Քաանին մեկնել էր Բեյրութ՝ հանդիպելու «Հեզբոլլահի» բարձրաստիճան պաշտոնյաների հետ:

Քաանին վերջին անգամ հանրությանը հայտնվել է Հասան Նասրալլայի սպանությունից երկու օր անց, երբ նրան լուսանկարել էին  Թեհրանում «Հեզբոլլահի» գրասենյակ ժամանելիս: Իրանական լրատվամիջոցներն սկսել են կոչ անել ղեկավարությանը հայտնել, թե որտեղ է այժմ Քաանին և ինչ վիճակում է: Իշխանություններից նաև հստակ պատասխան են պահանջում, թե արդյոք նա վիրավորվել է Բեյրութի վրա Իսրայելի հարձակումների ժամանակ։

Իսլամական հեղափոխության պահապանների կորպուսի անդամը, ով այժմ գտնվում է Բեյրութում, ասել է, որ Քաանիի վերաբերյալ իրանցի պաշտոնյաների լռությունը խուճապ է առաջացրել հասարակության մեջ։