Հիմալայներում 5 ռուսաստանցու դի է հայտնաբերվել

Հիմալայներում հայտնաբերվել են հոկտեմբերի 6-ին անհետացած Ռուսաստանից ժամանած հինգ ալպինիստների դիերը։ Այս մասին գրում է The Himalyan Times-ը։

Ալպինիստներից կազմված խումբը հոկտեմբերի 6-ի առավոտյան մեկնել է Նեպալյան Դաուլագիրի լեռը նվաճելու։ Այդ օրը նրանք վերջին կապն են հաստատել գլխավոր ճամբարի հետ։

Այսօր նրանց մարմինները հայտնաբերվել են 7,1 հազար մետր բարձրության վրա։ Փրկարարները կարծում են, որ նրանք կարող էին ընկնել 7,6 հազար մետր բարձրությունից։

Թիմի անդամներից մեկը ողջ է մնացել։ Նա թողել է հետագա վերելքը 7,4 հազար մետր բարձրության վրա և ինքնուրույն իջել ճամբար։ Տղամարդը ներկայումս գտնվում է Կատմանդուում։