Ադրբեջանի վրա ճնշում գործադրելն անիմաստ է․ Զախարովա

Արևմտյան ուժերի՝ Ադրբեջանի վրա ճնշում գործադրելու փորձերը տարբեր հարցերում, այդ թվում՝ կլիմայի փոփոխության, անօգուտ են և աննախադեպ, այսօր ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով Բաքվի հեռուստաընկերության հարցին։

«Ադրբեջանի վրա ճնշում գործադրելն անիմաստ է։ Ադրբեջանի վրա մեկ անգամ չէ, որ ճնշում է գործադրվել և տարբեր, այսպես ասած, հարցերի շուրջ։ Եվ բանն այն է, որ խոսքը ոչ միայն ինքնիշխան պետությունների վրա ճնշում գործադրելու անթույլատրելիության սկզբունքային դիրքորոշման մասին է, այլ այն մասին, որ այս թեման [կլիմայի փոփոխությունը] պահանջում է մասնագետների իրական ներգրավվածություն։ Դա չպետք է լինի ևս մեկ քաղաքական «մահակ», որով ԱՄՆ-ը կհարվածի բոլորի գլխին, միայն թե իր համար ձեռնտու որոշում կայացվի»,– ասել է նա։

Ըստ Զախարովայի՝ ԱՄՆ-ի նման մարտավարությունը դասական տեխնիկա է, որը կրկնվում է տարեցտարի մինչև COP կլիմայական համաժողովը։

«Ամեն տարի, «Կլիմայի փոփոխության մասին» շրջանակային կոնվենցիայի կողմերի հերթական համաժողովից առաջ, Վաշինգտոնը մեծացնում է ճնշումը նախագահող պետության վրա, հատկապես, եթե դա արբանյակ պետություն է։ Դա տեսանք, օրինակ, 2022 թվականին Շարմ էլ Շեյխում կողմերի համաժողովից առաջ։ Նույնը տեղի ունեցավ անցյալ տարի Դուբայում։ Հիմա տեսնում ենք, թե ինչպես է ավելանում ճնշումն Ադրբեջանի վրա՝ մտացածին պատրվակով»,– նշել է ՌԴ ԱԳՆ պաշտոնյան։