Մենք պատրաստ ենք ցանկացած սցենարի, թեև պшտերшզմ չենք ուզում. Արաղչի

Իրանի իշխանությունները պատրաստ են Մերձավոր Արևելքում հակամարտության զարգացման ցանկացած սցենարի, այդ թվում՝ Իսրայելի գործողություններին։ Այս մասին հայտարարել է Իսլամական Հանրապետության արտաքին գործերի նախարար Աբբաս Արաղչին։

«Մենք պատրաստ ենք ցանկացած սցենարի, միևնույն ժամանակ չենք ձգտում պատերազմի կամ էսկալացիայի»,- ասել է Արաղչին Al Jazeera-ին տված հարցազրույցում։ «Իսրայելցիները կարող են ստուգել մեր կամքը»,- հավելել է նա։

Իրանի ԱԳՆ ղեկավարի խոսքով՝ Իսրայելը ձգտում է ընդլայնել տարածաշրջանում հակամարտության աշխարհագրությունը և փորձում է Թեհրանին ներքաշել բաց առճակատման մեջ։ «Նախ մենք կտեսնենք, թե ինչպիսին կլինի Իսրայելի հարձակումը, և դրա հիման վրա մենք կորոշենք մեր պատասխանի բնույթը», - ասել է Արաղչին։

Ավելի վաղ Reuters-ը, հղում անելով իրանցի պաշտոնյային, հայտնել էր, որ Թեհրանը նախազգուշացրել է Պարսից ծոցի երկրներին Իսրայելին ռազմական օգնություն կամ օդային տարածք տրամադրելու մասին, եթե նա որոշի պատասխանել Իրանի հրթիռային հարվածին: Գործակալության զրուցակցի խոսքով՝ Իրանը նման նախազգուշացում է արել հոկտեմբերի 3-ին Իսլամական Հանրապետության նախագահ Մասուդ Փեզեշքիանի՝ Քաթար կատարած այցի ժամանակ։