Ղազախստանի նախագահը վետո է դրել Ժանաոզենի ընտրություններն արգելելու որոշման վրա

Ղազախստանի նախագահ Նուրսուլթան Նազարբաևը վետո է դրել խորհրդարանական ընտրություններին Ժանաոզենի բնակչության մասնակցությունն արգելելու սահմանադրական դատարանի որոշման վրա։

2011 թվականի դեկտեմբերին Ժանաոզենում տեղի ունեցած զանգվածային անկարգությունների հետևանքով 17 մարդ էր զոհվել և վիրավորվել էր ավելի քան 100 մարդ։ 

Մինչև հունվարի 31–ը Ժանաոզենում արտակարգ դրություն է հայտարարված։ Այդ պատճառով Ղազախստանի սահմանադրական դատարանն անցյալ շաբաթ որոշում է կայացրել այդ քաղաքում ընտրությունների անցկացման անհնարինության վերաբերյալ։ 

«Ղազախստանի նախագահը հաշվի է առել Ժանաոզենում տիրող լարված իրավիճակը և տեղի բնակչության մտահոգությունները և սահմանադրական դատարանի կայացրած որոշումը համարել է սահմանադրության կոպիտ խախտում և քաղաքացիների ընտրական իրավունքի սահմանափակում», - այս մասին նշվում է Ղազախստանի նախագահի մամլո ծառայության տարածած հաղորդագրությունում։