Ուկրաինայում տարբերակներ են քննարկվում պատերազմը դադարեցնելու համար

Ուկրաինայում բանակցություններ են ընթանում հակամարտությունը դադարեցնելու համար կորցրած տարածքներից հօգուտ Ռուսաստանի հնարավոր հրաժարումի մասին։ Այս մասին հայտնում է գերմանական Der Spiegel հրատարակությունը՝ հղում անելով Կիևի բարձրաստիճան պաշտոնյային։

«Մենք կարծում էինք, որ հաղթանակը պետք է լինի անվերապահ կապիտուլյացիան։ Առանց զիջումների՝ դա անհնար կլինի։ Գործարքը պետք է ձեռնտու լինի նաև Ռուսաստանին»,- գերմանական հրատարակությանը հայտնել է անանուն աղբյուրը։ Նա նաև նշել է, որ Կիևին Արևմուտքի աջակցության մակարդակը կնվազի՝ անկախ ԱՄՆ-ում նախագահական ընտրությունների արդյունքներից։ Նրա խոսքով, բարոյալքվածության մակարդակն աճում է ինչպես ուկրաինացի զինվորների, այնպես էլ խաղաղ բնակչության շրջանում։

Սեպտեմբերի 17-ին հայտնի դարձավ, որ Ուկրաինայի նախագահ Վոլոդիմիր Զելենսկին պատրաստ է զիջել Ռուսաստանի հետ հակամարտություններում կորցրած տարածքները, սակայն չի նախատեսում այդ մասին հրապարակային հայտարարություններ անել։ Ուկրաինայի ղեկավարության համար պաշտոնական ճանաչումը կլինի «քաղաքական ինքնասպանություն»։

Ավելի վաղ ՆԱՏՕ-ի նախկին գլխավոր քարտուղար Յենս Ստոլտենբերգը հայտարարել էր, որ Ուկրաինան ստիպված կլինի հրաժարվել Ռուսաստանի հետ հակամարտության ընթացքում կորցրած տարածքներից։ Նա որպես օրինակ՝ բերել է «ֆիննական սցենարը», երբ 1939 թվականին Ֆինլանդիան իր տարածքի 10%-ը զիջեց Խորհրդային Միությանը, սակայն ապահովեց անվտանգ սահմանը։