Էլեկտրամոբիլների անմաքս ներկրման քվոտայի մնացորդը կազմում է 317 հատ. ՊԵԿ

Հայաստան էլեկտրական շարժիչով տրասնպորտային միջոցների 0 տոկոս ներմուծման մաքսատուրքի դրույքաչափի քվոտայի շրջանակում ներմուծման սակագնային քվոտայի մնացորդը կազմում է 317 հատ։ Տեղեկությունը հայտնում է ՀՀ պետական եկամուտների կոմիտեն։

Նշենք, որ նախապես սահմանված 7400 հատ քվոտայի սպառված լինելու պայմաններում ՀՀ կառավարության` հոկտեմբերի 10–ի որոշմամբ՝ ներմուծման սակագնային քվոտան ավելացվել էր ևս 600 հատով։

Հիշեցնենք` ԵԱՏՄ անդամ երկրների համար էլեկտրամոբիլների ներկրման քվոտա առաջին անգամ սահմանվել է 2022 թվականի մարտին։ Հայաստանի համար այդ որոշմամբ սահմանվել էր 7 000 ավտոմեքենայի անմաքս ներկրման իրավունք։ Ու թեև դրանից ամբողջ տարվա ընթացքում սպառվել էր միայն 2680–ը, հաջորդ` 2023թ–ի համար Հայաստանին տրամադրվել էր 8000 ավտոմեքենայի քվոտա, որը դարձյալ ամբողջությամբ չէր սպառվել (2023 թ–ին ՀՀ է ներկրվել գրեթե 4500 էլեկտրամոբիլ։

2024 և 2025թ–ի համար ևս Հայաստանին տրամադրվել է տարեկան 8000 ավտոմեքենայի անմաքս ներմուծման քվոտա։

ՊԵԿ տվյալներով` այս տարվա սեպտեմբերի 16-ի դրությամբ ՀՀ մաքսակետերում ձևակերպվել և բաց է թողնվել 6524 էլեկտրամոբիլ, որոնցից 4658-ը (71.4%) ներմուծվել է ֆիզիկական անձանց կողմից, 1866-ը` (28.6%) իրավաբանական անձանց կողմից, այսինքն` վիճակագրությունը ցույց է տալիս, որ ներմուծումները իրականացվել են հիմնականում ֆիզիկական անձանց կողմից։