Պուտինը BRICS-ի երկրների ղեկավարներին առաջարկել է քննարկել տարածաշրջանային սուր հակամարտությունները

Ռուսաստանի նախագահ Վլադիմիր Պուտինը ելույթ է ունեցել BRICS գագաթնաժողովի սահմանափակ ձևաչափով հանդիպմանը։ Նա հրավիրել է BRICS-ի երկրների ղեկավարներին՝ քննարկելու միջազգային օրակարգի հարցեր, այդ թվում՝ տարածաշրջանային սուր հակամարտությունների լուծումը, հաղորդում է Kommersant-ը։

Ըստ Պուտինի՝ Ռուսաստանի Դաշնությունն այս տարի մեծ պատասխանատվությամբ է մոտեցել BRICS-ի շրջանակներում համատեղ գործունեության կազմակերպմանը։ Ի թիվս այլ բաների՝ նա հայտարարել է, որ իշխանությունները «ամեն ինչ արեցին՝ ապահովելու նոր անդամ երկրների սահուն և հնարավորինս լիարժեք ինտեգրումը ասոցիացիայի աշխատանքին», ինչպես նաև մեծացնելու BRICS-ի դերը «գլոբալ և տարածաշրջանային հրատապ խնդիրների լուծման գործում»:

«Այժմ, նեղ հանդիպման ժամանակ, մենք առաջարկում ենք դիտարկել գլոբալ օրակարգի ամենաարդիական ասպեկտները, կարծիքներ փոխանակել միջազգային ասպարեզում BRICS-ի երկրների համագործակցության թեմայի շուրջ՝ ներառյալ սուր տարածաշրջանային հակամարտությունների լուծումը», - ասել է Վլադիմիր Պուտինը: