Էրդողանն ընդհատել է մասնակցությունը BRICS-ի գագաթնաժողովին և վերադարձել Թուրքիա. ԶԼՄ

Թուրքիայի նախագահ Ռեջեփ Թայիփ Էրդողանը Թուրքիա է վերադարձել հոկտեմբերի 24-ի առավոտյան՝ ընդհատելով իր այցը Կազան՝ BRICS-ի գագաթնաժողովին։

Այս մասին հայտնում է A haber հեռուստաալիքը։

Նշվում է, որ թուրք նախագահը դեռ հոկտեմբերի 24-ին ծրագրված շփումներ ուներ, սակայն Անկարայում տեղի ունեցած հարձակման պատճառով ավելի վաղ է լքել Կազանը։

TRT հեռուստաալիքն իր հերթին հայտնել է, որ Էրդողանը չի մասնակցել Կազանում գագաթնաժողովի կապակցությամբ կազմակերպված գալա ընդունելությանը։

Նշենք, որ  Անկարայում ահաբեկչություն է տեղի ունեցել ռազմական ինքնաթիռներ և տիեզերական տեխնիկա արտադրող թուրքական TUSAŞ կորպորացիայի արտադրական օբյեկտում։ Հարձակվողների կողմից իրականացված պայթյունների և կրակոցների հետևանքով հինգ մարդ զոհվել է, ևս 22-ը՝ վիրավորվել։