Ուկրաինական հարցի ցանկացած հանգուցալուծում պետք է լինի հօգուտ Ռուսաստանի. Պուտին

«Կիևի իշխանությունները իռացիոնալ են վարվում։ Այս հիմքով հնարավոր չէ ինչ-որ պլաններ կազմել, և նույնիսկ որևէ բանի շուրջ համաձայնության գալու հնարավորության մասին հիշատակելը վաղաժամ է»։ Այս մասին հայտարարել է ՌԴ նախագահ Վլադիմիր Պուտինը Օլգա Սկաբեևայի՝ «60 րոպե» հաղորդման համար տված հարցազրույցում:

Նրա խոսքով՝ ուկրաինական հարցի կարգավորման ցանկացած ելք պետք է լինի հօգուտ Ռուսաստանի և հիմնված լինի մարտի դաշտում առկա իրողությունների վրա։ 

«Մոսկվան մտադիր չէ գնալ որևէ զիջման կամ փոխանակման։մՑանկացած ելք պետք է լինի Ռուսաստանի օգտին։ Ես անկեղծորեն ասում եմ՝ այն պետք է հիմնված լինի այն իրողությունների վրա, որոնք ի հայտ են գալիս մարտի դաշտում, և մենք, անկասկած, չենք պատրաստվում գնալ զիջումների և չենք պատրաստվում փոխանակումներ անել»,- ասել է Պուտինը։