Չելյաբինսկի մարզում 32-ամյա կինը իր նորածնին նետել է լվացքի մեքենայի մեջ. երեխան մահացել է

Չելյաբինսկի մարզի Սատկա քաղաքում կինը իր նորածինին փաթաթել է տոպրակի մեջ ու դրել լվացքի մեքենան։ Երեխան մահացել է, քննիչները քրեական գործ են հարուցել։ Այս մասին հայտնել է «Ռեգնում» գործակալության աղբյուրը։

Նոյեմբերի 5-ին Սատկա քաղաքի հիվանդանոցներից մեկի բժիշկները դիմել են ոստիկանություն։ Նրանք հայտնել են ծննդկանի մասին, ով հետծննդաբերական վնասվածքներով ներկայացել է բուժհաստատություն, սակայն երեխան նրա հետ չի եղել։

«Ոստիկանությունն այս փաստի առթիվ հետաքննություն է սկսել, կինը հարցաքննվել է։ 32-ամյա կինը պատմել է, որ նոյեմբերի 4-ի երեկոյան իր մոտ կծկումներ են սկսվել։ Նոյեմբերի 4-ի ժամը 21:00-ից նոյեմբերի 5-ի ժամը 3:00-ն ընկած ժամանակահատվածում կինը տղա է լույս աշխարհ բերել։ Նրա խոսքով՝ ինքը որոշել է, թե տղան մահացած է ծնվել։ Այնուհետև նա երեխային փաթաթել է տոպրակի մեջ և տեղավորել լվացքի մեքենայի թմբուկի մեջ»,- ասել է աղբյուրը։

Կնոջ բնակության վայրում խուզարկություն է կատարվել, իսկ երեխայի դին հայտնաբերվել է լվացքի մեքենայի մեջ։ Այն ուղարկվել է դատաբժշկական փորձաքննության՝ մահվան պատճառը պարզելու համար։

Աղբյուր` Փաստինֆո