«Չորրորդ ինքնիշխանություն». Հրաչ Քեշիշյանին ազատել են աշխատանքից

Թերթը գրում է. ««ATV» հեռուստաընկերությունում, որը «Արմենիա» եւ «Արմնյուզ» հեռուստաընկերությունների հետ միաժամանակ հանդիսանում է Միքայել Մինասյանի մեդիահոլդինգի մի մասը, օրերս կադրային փոփոխություններ են տեղի ունեցել: «ՉԻ» տեղեկություններով «ATV»-ի տնօրեն Հրաչ Քեշիշյանին պաշտոնանկ են արել: Վերջինիս այլեւս առաջարկվել է նոր պաշտոն, այն է՝ «Արմենիա», «Արմնյուզ» եւ «ATV»-ի հեռուստաընկերությունների գլխավոր պրոդյուսեր: Այս պաշտոնի անունն, անշուշտ, հնչեղ է, բայց իրականում հոլդինգի ղեկավարությունը լուծել է շատ էական խնդիր, այն է՝ Հրաչ Քեշիշյանից ազատագրել է մի ամբողջ հեռուստաընկերություն՝ իր քաղաքական եւ լրատվական բլոկով հանդերձ: Ինչպես հայտնի է, Հրաչ Քեշիշյանը ժամանակ առ ժամանակ աչքի է ընկնում լրատվական-քաղաքական բնույթի հաղորդումներ «սարքելու» ամբիցիաներով, եւ կարճ ժամանակում վերջինիս շրջապատում հասկանում են, որ նա այդ գործում, մեղմ ասած, չկա: Հրաչ Քեշիշյանի՝ «աստղեր» բուծելու ժամանակներն անցել են, եւ մարդն իր գործունեության համար նոր ոլորտ է փնտրում՝ զուր ջանքեր եւ ժամանակ կորցնելով այնտեղ, որտեղ վերջինս պարզապես չի կարող ասելիք ունենալ: Կարիք էլ չկա առանձնապես ծավալվելու՝ ինչու: Բոլորն էլ ճանաչում են Հրաչ Քեշիշյանին, եւ գիտեն վերջինիս տաղանդի տիրույթները:

Ավելացնենք նաեւ, որ երկու օր առաջ, երբ Հրաչ Քեշիյանին ազատել են աշխատանքից, վերջինս չնախատեսված ժողով է հրավիրել, եւ ընդլայնված ժողովի շրջանակներում բոլորի համար անսպասելի հայտարարել է, թե աշխատանքից ազատված է նաեւ «ATV»-ի հեռուստաընկերության «Փաստ» մեդիա ցանցի գլխավոր խմբագիր Վարդուհի Սիմոնյանը: Խոսքն, ըստ էության, լրատվական թողարկումների խմբագրի մասին է: Նկատենք, որ «Փաստ» խումբը սոցիալական ցանցերում շատ կարճ ժամանակում դարձավ ամենաազդեցիկներից մեկը, որտեղ ծավալվող համարձակ քննարկումներն ու բանավեճերը շատ հաճախ ուղիղ մեջբերումներով հայտնվում էին «ATV»-ի լրատվական բլոկի եթերում»: