Հմայակ Հակոբյանի ստեղծագործությունների ցուցահանդես Ազգային պատկերասրահում

19-րդ դարի վերջի և 20-րդ դարի սկզբի հայ ռեալիստական արվեստի նշանավոր դեմքերից է Հմայակ Հակոբյանը (1871, Տրապիզոն- 1939, Թիֆլիս), որի ստեղծագործական հարուստ ժառանգությունը պատշաճ ուշադրության չի արժանացել: Այդ բացը լրացնելուն է ուղղված ներկա ցուցահանդեսը:

Նկարիչը մասնագիտական կրթություն է ստացել Մյունխենի գեղարվեստի ակադեմիայում (1891-1894 թ.), ապրել ու ստեղծագործել Թիֆլիսում, ճամփորդել Շվեյցարիայում ու բազմիցս այցելել Հայաստան: 1889 թվականից գեղանկարչական ու գրաֆիկական աշխատանքներով մասնակցել Թիֆլիսում ու Երևանում կազմակերպվող ցուցահանդեսներին:

Նրա նախասիրությունները դրսևորվել են կերպարվեստի բոլոր ժանրերում: Նկարել է Թիֆլիսի բազմազգ բնակչության կյանքին ու կենցաղին նվիրված թեմատիկ ու ժանրային հորինվածքներ, ազգային ու անհատական բնութագրումով առանձնացող իր մտերիմ մարդկանց և տարբեր ազգերի ներկայացուցիչների դիմանկարներ, էտյուդային բնույթի գողտրիկ բնանկարներ ու դասական հորինվածքով նատյուրմորտներ, նոր թեմաներով ու ժանրերով, գեղարվեստական արտահայտչամիջոցներով հարստացրել հայ արվեստը:

Նկարչի ստեղծագործական ժառանգության գերակշռող մասը (2850 գեղանկարչական ու գրաֆիկական գործեր) պահպանվում են Ազգային պատկերասրահում, որի ուսումնասիրության արդյունքում գրվել է գիտական, համահավաք կատալոգ: Նյութական միջոցները չբավարարելու պատճառով հոբելյանական ցուցահանդեսի կապակցությամբ ստեղծված աշխատությունը հնարավոր չեղավ հրատարակել: Այն կարևոր է ոչ միայն մոռացության մատնված նկարչի արվեստը վերաարժևորելու, այլև պատկերասրահի հավաքածուի հանրաճանաչման գործում: 

Ցուցահանդեսի բացումը տեղի է ունեցել 2011թ. դեկտեմբերի 9-ին և շարունակվելու է մինչև սույն թվականի փետրվարի 9-ը: