Թրամփի վարչակազմը հատուկ բանագնաց կունենա Ուկրաինայի հարցով. Fox News

Դոնալդ Թրամփի վարչակազմը կունենա Ուկրաինայի հարցով հատուկ բանագնացի պաշտոն, որը կվերահսկի ԱՄՆ կողմից պատերազմի ավարտին ուղղված բանակցությունները, հայտնում է Fox News-ը։

Հատուկ բանագնացի անունը կհրապարակվի «շուտով»։ Սա կլինի «մեծ հեղինակություն ունեցող անձ» և իր առջև «խնդիր կուենա՝ գտնելու լուծումներ, որոնք կհանգեցնեն խաղաղ կարգավորման»։

Թրամփի կառավարման առաջին ժամկետում՝ 2017-2019 թվականներին, նրա վարչակազմն արդեն ուներ Ուկրաինայում խաղաղ բանակցությունների համար հատուկ բանագնաց (այն ժամանակ դա վերաբերում էր Մինսկի համաձայնագրերի իրականացմանը-խմբ․)։ Առաջին և միակ մարդը, ով զբաղեցրել է այդ պաշտոնը, Կուրտ Ուոքերն էր: Բայդենը նման հատուկ բանագնաց չի ունեցել։

Ուոքերը տեխնիկապես համարվում էր կամավոր խորհրդական և որպես պետական ​​աշխատող՝ աշխատավարձ չէր ստանում։

Fox News-ը նշում է, որ հավանական է, որ նոր հատուկ բանագնացը նույնպես առանց վարձատրության կկատարի իր պարտականությունները։