Աշխարհը մեկ րոպեով մոտեցավ ատոմային պատերազմին

Աշխարհը մեկ րոպեով մոտեցավ ատոմային պատերազմին. այս եզրահանգմանն են եկել «Ատոմային գիտնականների տեղեկագիր» ամերիկյան ամսագրի հրատարակիչները: Այն հիմնադրվել է Չիկագոյի համալսարանի գիտնականների կողմից, որոնք մասնակցել են միջուկային զենքի ստեղծման աշխատանքներին, բայց դարձել են պացիֆիստ՝ սարսափելով Ճապոնիայի ռմբակոծություններից:

Երեքշաբթի օրը կայացած ասուլիսի ժամանակ նրանք հայտարարել են, որ մեկ րոպեով առաջ են տալիս «Դատաստանի օրվա» ժամացույցի  սլաքները: Հիմա նրանք ցույց են տալիս 23 ժամ 55րոպե: Այսինքն «ատոմային կեսգիշերին» մնացել է ընդամենը 5 րոպե: Վերջին անգամ ժամացույցի  սլաքները այսպիսի մակարդակի վրա են գտնվել 2007թ.-ին: Անցյալ տարի սլաքները ընդհանրապես չեն տեղաշարժվել, իսկ 2010թ.-ին անգամ մեկ րոպեով ետ են տեղաշարժվել:

«Չնայած այն հեռանկարներին, որոնք բացվում  են ԱՄՆ-ի և Ռուսաստանի միջև նոր լիցք ստացած համագործակցությամբ, «Ատոմային գիտնականների տեղեկագիր ամսագրի գիտության և անվտանգության հանձնաժողովը կարծում է, որ ատոմային պատերազմից զերծ մնալու ուղին դեռ բացահայտված չէ, իսկ երկու երկրների ղեկավարությունները չեն կարողանում կատարել ստանձնած պարտավորությունները»,- ասվում է ամսագրի հայտարարության մեջ: