Իրանն ու Ադրբեջանը ռազմական համագործակցության մասին արձանագրություն են ստորագրել

Ադրբեջանի պաշտպանության նախարարության պատվիրակությունն այցելել է Թեհրան՝ մասնակցելու Ադրբեջանի ՊՆ և Իրանի ԶՈւ գլխավոր շտաբի միջև Ռազմատեխնիկական համագործակցության համատեղ հանձնաժողովի նիստին։ Այս մասին հայտնում է Report-ը։

Այցի ընթացքում ադրբեջանական պատվիրակության ղեկավար, ռազմատեխնիկական աջակցության գլխավոր վարչության պետի պաշտոնակատար, գեներալ-մայոր Ֆարիդ Ալիևը հանդիպել է Իրանի զինված ուժերի գլխավոր շտաբի պետի առաջին տեղակալ, գեներալ-մայոր Մոհամմադրզա Աշտիանիի հետ։

Հանդիպմանը մտքերի փոխանակություն է տեղի ունեցել երկու երկրների միջև ռազմական համագործակցության ներկա վիճակի և զարգացման հեռանկարների շուրջ, քննարկվել են փոխադարձ հետաքրքրություն ներկայացնող այլ հարցեր։

Կողմերը քննարկել են նաև Ադրբեջանի և Իրանի ռազմական կառույցների միջև համագործակցության զարգացման հարցեր։

Ստորագրվել է արձանագրություն, որը պարունակում է հոդվածներ համագործակցության այն ոլորտների վերաբերյալ, որոնց շուրջ ձեռք է բերվել պայմանավորվածություն։