ԱՄՆ–ը փորձում է նվազեցնել համաշխարհային տնտեսության կախվածությունն իրանական նավթից

ԱՄՆ-ն ակնկալում է Թուրքիայի աջակցությունը համաշխարհային տնտեսության կախվածությունը իրանական նավթից նվազեցնելու հարցում։ Իրանական նավթից համաշխարհային շուկայի կախվածությունը նվազեցնելու հարցը և դրա հետ կապված նոր պատժամիջոցների կիրառումն, այն հարցերն են, որոնք ԱՄՆ–Թուրքիա հարաբերությունների օրակարգում են գտնվում։ Այս մասին լրագրողների հետ հանդիպման ժամանակ հայտարարել է ԱՄՆ պետքարտուղարության խոսնակ Վիկտորիա Նուլանդը։

Նուլանդն ընդգծել է, որ Միացյալ նահանգները վերջին ամիսներին շարունակում է ինտենսիվ քննարկումները Թուրքիայի հետ, ասելով, որ Անկարան եւ Վաշինգտոնը Իրանի միջուկային ծրագրի շուրջ կիսում են ընդհանուր ռազմավարական նպատակներ։

Մինչդեռ, չինական «Huantsyu shibao» թերթը հաղորդում է, որ Թուրքիան մտադիր չէ աջակցել Իրանի դեմ ԱՄՆ–ի և Արևմուտքի կողմից կիրառվող կոշտ պատժամիջոցներին։

«Միացյալ նահանգները կոչ է արել Թուրքիային մեծացնել ճնշումները Թեհրանի նկատմամբ։ Թուրքիան՝ լինելով ՆԱՏՕ-ի անդամ, ունի նաև սերտ առեւտրային հարաբերություններ Իրանի հետ։ Թուրքական կողմը հայտարարել է, որ հարգում է միայն այն պատժամիջոցները, որոնք կիրառվում են ՄԱԿ-ի կողմից, և որոնք չեն համաձայնեցվել ԱՄՆ–ի և Արևմուտքի հետ», - նշվում է հրապարակման մեջ։

Ինչպես գրում է թերթը, ԱՄՆ պետդեպի մի շարք բարձրաստիճան պաշտոնյաների չի հաջողվել  փոխել Թուրքիայի նման դիրքորոշումը. վերջին փորձը կատարվել է ԱՄՆ պետքարտուղարի օգնական Ուիլյամ Բըրնսի կողմից վերջերս Անկարա կատարած այցելության ժամանակ»։ 

Իր հերթին, հաջորդ շաբաթ Թուրքիա է ժամանելու Իրանի արտաքին գործերի նախարար Ալի Աքբար Սալեհին։ Վերջինս հունվարի 18–ին Անկարա է ժամանելու թուրք–իրանական առևտրատնտեսական համաժողովին մասնակցելու համար։  Չնայած այն հանգամանքին, որ այցի նպատակն է երկկողմ առեւտրատնտեսական հարաբերությունների քննարկումը, այցի ընթացքում սպասվում է, որ նաեւ կքննարկվեն Իրանի միջուկային ծրագրի հետ կապված հարցեր և տարածաշրջանային վերջին զարգացումները։ Հաղորդում է «Regnum» լրատվական գործակալությունը