Հայկական ժամանակ. «Կողմնորոշվիր Ծառուկյան»

«Հայկական ժամանակ» թերթը գրում է. «Իշխանական մեր աղբյուրները փոխանցում են, որ Սերժ Սարգսյանը վերջնագիր է ներկայացրել «Բարգավաճ Հայաստան» կուսակցության նախագահ Գագիկ Ծառուկյանին։ Վերջնագրի ժամկետը լրանում է ուրբաթ օրը, և մինչ այդ Գագիկ Ծառուկյանը պետք է կողմնորոշվի. կամ հայտարարում է, որ նախագահական ընտրություններում սատարելու է Սերժ Սարգսյանին, կամ իր կուսակցությունը դուրս է գալիս կոալիցիայից։

Երեկ ՀՀԿ խոսնակ Էդուարդ Շարմազանովը ըստ էության չի հերքել այս տեղեկատվությունը, մեր թղթակցի հարցին՝ իրականությանը համապատասխանում է, թե՞ ոչ, պատասխանելով. «Դա արդեն ձեր տեղեկությունն է, դուք ձեր աղբյուրների հետ քննարկեք և իմացեք։ Հանրապետականը քննարկում է ներքաղաքական խնդիրները, և քանի դեռ քննարկումները չեն ավարտվել, կուսակցությունը կարող է նաև մանրամասների մասին չասել»։ Նույն հարցին ոչ պակաս երկիմաստ պատասխան է տվել Գագիկ Ծառուկյանի մամուլի խոսնակ Խաչիկ Գալստյանը. «Նման որևէ տեղեկություն մենք չունենք»։ Ոչ թե ասվում է՝ «նման բան չկա», այլ՝ «նման տեղեկություն չունենք», ինչը նշանակում է՝ հնարավոր է, որ լինի, բայց մենք չգիտենք։

Մինչդեռ հանրապետական պատգամավոր Հովհաննես Սահակյանը երեկվա ասուլիսում, ըստ էության, հաստատել է, որ կոալիցիայի ճակատագիրը վճռվելու է այս շաբաթ։ «Անցած ուրբաթ կայացած ՀՀԿ գործադիր մարմնի նիստում քննարկել ենք ՀՀ ներքաղաքական իրավիճակին վերաբերող մի շարք հարցեր։ Բայց դա չի նշանակում, որ միայն ԲՀԿ–ի, ՕԵԿ–ի կամ կոալիցիայի մասին է խոսվել։ Պայմանավորվել ենք, որ հանդիպումը պետք է շարունակվի առաջիկա հինգշաբթի, որտեղ և պետք է կայացվի ընդհանուր որոշում», – ասել է նա։ Այսպիսով, Գագիկ Ծառուկյանին ընդհամենը մի քանի օր ժամանակ է մնացել՝ կողմնորոշվելու համար»։