Լիբանանը հետզհետե ներքաշվում է սիրիական հակամարտության մեջ

Զինյալ ապստամբներն առավոտից կրակահերթի են ենթարկում Լիբիանանի հյուսիսային շրջաններում տեղակայված ռազմաբազաները, որոնք գտնվում են սուննիների և ալավիտների թաղամասերի մերձակայքում: Այս մասին հաղորդում է ИТАР-ТАСС գործակալությունը՝ հղում կատարելով տեղական Ալ-Վաթանիա գործակալությանը:

Բժշկական տվյալների համաձայն՝ վերջին մի քանի ժամվա ընթացքում փողոցային կրակահերթերի արդյունքում զոհվել է 6 մարդ, ավելի քան 40 մարդ վիրավոր է: 

Այս ահաբեկչությունն անմիջական կապ ունի Սիրիայում տիրող իրավիճակի հետ. անցած շաբաթ Սիրիայում սպանվել էր ծայրահեղական սալաֆիտների մի վարձու խումբ: Դեպքից հետո Լիբանանի կառավարությունը դիմել էր պաշտոնական Դամասկոսին՝ խնդրելով հետ վերադարձնել զոհվածների դիակները, ինչն էլ տեղի էր ունեցել այսօր երկու երկրների սահմանային Էլ-Արիդա շրջանում. Լիբանանին էր հանձնվել երեք մահացած զինվորականի դիակ:

Լիբանանի նախագահ Միշել Սուլեյմանը հրավիրել էր պաշտպանության նախարարության գերագույն խորհրդի արտահերթ նիստ, որի ժամանակ պետք է քննարկվեր իրավիճակը Լիբանանի հյուսիսային շրջաններում: 

Օպոզիցիոն ուժերի թելադրանքով հյուսիսում սուննիներն աջակցություն են ցուցաբերում Բաշար Ասադի դեմ հանդես եկողներին: Դամասկոսն առաջին անգամը չէ, որ Լիբանանին զգուշացնում է, որ Սիրիա են ներթափանցում լիբանանցիներից կազմված ահաբեկչական խմբավորումներ: Արդյունքում, հետզհետե Լիբանանը ներքաշվում է հարևան երկրում տիրող կոնֆլիկտային իրավիճակի մեջ:

Իր հերթին Լիբանանում գործում է ալավիտներից բաղկացած «Հըզբոլլա» ահաբեկչական կազմակերպությունը, որի ետևում կանգնած է ոչ այլ ոք, քան Սիրիայի նախագահ Բաշար Ասադը, գրում է լրատվականը:

Ինչպես նշում են տարածաշրջանային փորձագետները, իրավիճակի հետագա սրումը կարող է հանգեցնել առերեսման և կոնֆլիկտի տարածմանը Լիբանանի այլ շրջաններում ևս: