Էրդողանը կարող է 3-րդ անգամ առաջադրվել նախագահի պաշտոնում

Թուրքիայի նախագահ Ռեջեփ Թայիփ Էրդողանը կարող է երրորդ անգամ առաջադրվել պետության ղեկավարի պաշտոնում, եթե խորհրդարանը որոշի արտահերթ ընտրություններ անցկացնել 2027 թվականի երկրորդ կեսին։ Նման կարծիք է հայտնել Թուրքիայի ղեկավարի ավագ խորհրդական Մեհմեթ Ուչումը, հաղորդում է ՏԱՍՍ-ը։

«Սահմանադրության համաձայն՝ եթե խորհրդարանը որոշի արտահերթ ընտրություններ անցկացնել գործող նախագահի երկրորդ ժամկետում, նախագահը կարող է կրկին թեկնածու լինել՝ համաձայն Սահմանադրության 116/3 հոդվածի», - գրել է Ուչումը X-ում:

Էրդողանի երկրորդ նախագահական ժամկետը լրանում է 2028 թվականին, որից հետո, ըստ օրենքի, քաղաքական գործիչն այլևս չի կարող առաջադրվել, քանի որ նա այս պաշտոնը զբաղեցրել է երկու ժամկետ անընդմեջ։ Միաժամանակ, երկիրը պարբերաբար ակտիվացնում է արտահերթ ընտրությունների շուրջ քննարկումները, որոնց հնարավորությունը երկրի ղեկավարությունը դեռ չի հաստատել։

Ուչումը նշել է, որ արտահերթ ընտրությունների անցկացման հարցը կարող է լուծել միայն խորհրդարանը։ «Նախագահի համար Էրդողանի թեկնածության բացառիկ հնարավորությունը կարող է հնարավոր լինել միայն համապատասխան սահմանադրական դրույթի կիրառման դեպքում։ Նման որոշում կայացնելու իրավասությունը պատկանում է խորհրդարանին։ Եթե 360 պատգամավորների համաձայնությամբ նա որոշի վաղաժամ անցկացնել ընտրությունները մինչև 2028 թվականի մայիսի 7-ին նախատեսված համընդհանուր ընտրությունները, օրինակ՝ 2027 թվականի երկրորդ կեսին, այն ժամանակ նախագահ Էրդողանը կկարողանա կրկին առաջադրվել, և սա կլինի վերջին անգամը»,- ասել է Ուչումը։