Ռուսական և սիրիական զորքերը հարվածել են Հալեպում ահաբեկիչների դիրքերին

Սիրիայի ռազմաօդային ուժերի և Ռուսաստանի օդատիեզերական ուժերի նինքնաթիռները գրոհել են ահաբեկիչների դիրքերը Հալեպի նահանգի արևելքում։ Այս մասին հայտնում է Սիրիայի պաշտպանության նախարարության մամուլի ծառայությունը, փոխանցում է SANA-ն։

Պաշտպանության գերատեսչության տվյալներով՝ հարվածը հասցվել է Սֆիրի բնակավայրի տարածքում։ Հարձակման արդյունքում՝ ռուս և սիրիական զորքերը ոչնչացրել և վիրավորել են տասնյակ ահաբեկիչների։ Բացի այդ, ոչնչացվել է ռազմական տեխնիկա։

Նոյեմբերի 28-ին CNN-ը հայտնել է, որ սիրիական զինված ընդդիմադիր խմբավորումները խոշոր հարձակում են սկսել կառավարական զորքերի դեմ Հալեպի նահանգի արևմտյան շրջաններում։ Հեռուստաալիքի աղբյուրի փոխանցմամբ՝ արդյունքում գրոհայինները գրավել են 13 բնակավայր, այդ թվում՝ ռազմավարական նշանակություն ունեցող Ուրմ էս-Սուղրա եւ Այնճար քաղաքները։

Նոյեմբերի 30-ին Սիրիայի պաշտպանության նախարարությունը հայտնել է, որ ահաբեկչական խմբավորումները ներխուժել են Հալեպ քաղաքի բազմաթիվ շրջաններ։ Ռուսական ավիացիան հարվածներ է հասցնում գրոհայինների կենտրոններին։