Քաղաքապետարանից պահանջել են՝ բունտ անող վարորդները ազատման դիմում գրեն

Երևանի քաղաքապետարանը միջնորդավորված և ուղիղ տեքստով պահանջ է ներկայացրել առավոտից բունտ անող և երթուղային գիծ դուրս չեկած ավտոբուսների վարորդներին՝ ազատման դիմումներ գրել և հեռանալ։ Այս մասին Եվրոմեդիա 24-ի թղթակցին հայտնել են բունտ անող վարորդները:

Ավելին՝ քաղաքապետ  Տիգրան Ավինյանի խոսնակ Հայկ Կոտանյանն իր ֆեյսբուքյան էջով տարածած հաղորդագրության մեջ նաև սպառնացել է սոցիալական բունտ անող վարորդներին, թե քրեական պատասխանատվության կենթարկվեն:   

«Վերոնշյալ գործողություններին տրվելու է գնահատական աշխատանքային օրենսդրության շրջանակներում, ինչպես նաև դիմելու ենք պատկան մարմիններին՝ վերոնշյալ արարքներին պատշաճ քրեաիրավական գնահատական տալու նպատակով»,-ասված է Ավինյանի խոսնակի տարածած արձագանքում։

 «Հարկ ենք համարում հատուկ շեշտել․ ՀՀ աշխատանքային օրենսդրությամբ սահմանվում է, որ քաղաքային հասարակական տրանսպորտի կազմակերպության աշխատակիցները գործադուլ իրականացնելու մասին առնվազն 14 օր առաջ պարտավոր են ծանուցել այդ մասին և անգամ այդ դեպքում պարտավոր են գործադուլի ընթացքում ապահովել նվազագույն պայմաններ, որոնք անհրաժեշտ են հասարակության անհետաձգելի կարիքները բավարարելու համար։

Տեղեկացնում ենք նաև, որ վերոնշյալ գործողություններին տրվելու է գնահատական աշխատանքային օրենսդրության շրջանակներում, ինչպես նաև դիմելու ենք պատկան մարմիններին՝ վերոնշյալ արարքներին պատշաճ քրեաիրավական գնահատական տալու նպատակով», այս մասին գրել է Հայկ Կոստանյանը՝ առանձնապես չանդրադառնալով հարցին, թե քանի վարորդ է գործադուլին միացել, ինչ միջոցների է դիմել Երևանի քաղաքապետարանը, որպեսզի լուսաբացից Երևանում կաթվածահար եղած երթեւեկության խնդրին լուծում տա, և ինչ քայլեր են ձեռնարկվել երթուղայինից օգտվելու ներդրած նոր համակարգի  պատճառով վարորդների աշխատավարձերի հաշվման մեթոդաբանությունից դժգոհ ամբողջ վարորդական 1200 հոգանոց կազմի հետ գնա կոմպրոմիսային լուծումների, որպեսզի սոցիալական բունտ չծագի, ինչն եղավ այսօր: Ընդգծենք՝ Տիգրան Ավինյանը և նրա որևէ տեղակալ փորձ չարեցին անձամբ մոտենալու ավտոբուսների պարկի մոտ գործադուլ հայտարարած վարորդներին և տեղում պատասխանելու նրանց բարձրացրած մտահոգություններին:

 Ի դեպ, վարորդները չեն պատրաստվում ազատման դիմում գրել։ Նրանց հետ այս պահին «բունտին» մասնակցում են նաև «Հայաստան» խմբակցության ավագանու անդամներ: