Հարավային Կորեայի նախագահի՝ ռազմական դրություն մտցնելու փորձը չի հաջողվել․ BBC

Հարավային Կորեայի նախագահ Յուն Սեոկ Յոլի անսպասելի փորձը՝ երկրում ռազմական դրություն մտցնելու, վեց ժամ անց անհաջողությամբ է ավարտվել։ Խորհրդարանը քվեարկել է ռազմական դրությունը հանելու օգտին, և նախագահը նահանջել է, հայտնում է BBC-ն:

«Ազգային ժողովը պահանջել է վերացնել արտակարգ դրությունը, և մենք հետ ենք կանչել այն զինվորականներին, ովքեր ներգրավված էին ռազմական դրություն մտցնելու գործողություններում։ Մենք կընդունենք Ազգային ժողովի պահանջը և կհանենք ռազմական դրությունը կառավարության նիստում», - ասել է Յուն Սեոկ Յոլը հեռուստատեսային ուղերձում:

Այնուհետև նախարարների կաբինետը հանդիպել և քվեարկել է ռազմական դրությունը չեղարկելու օգտին: Զինվորականները վերադարձել են իրենց ստորաբաժանումներ։

Չորեքշաբթի առավոտյան հրաժարական է տվել նախագահի ողջ կազմը։ Ինքը՝ նախագահը, տեղական ժամանակով ժամը 10։00-ին դեռևս նոր հայտարարություններ չի արել։

Խորհրդարանում մեծամասնություն ունեցող Դեմոկրատական ​​կուսակցությունից նախագահի հակառակորդները նշել են, որ եթե նա ինքը հրաժարական չտա, իրենք իմպիչմենտի գործընթաց կսկսեն։

Ավելի վաղ, ինչպես հայտնել ենք, Կորեայի Հանրապետության նախագահ Յուն Սեոկ Յոլը հայտարարել է «արտակարգ ռազմական դրություն» մտցնելու մասին։ 

«Այս միջոցներն անհրաժեշտ են հակապետական ուժերին ճնշելու և Կորեայի Հանրապետությունը պահպանելու համար։ Տարբեր պաշտոնյաների իմպիչմենթի միջոցով փորձում են կաթվածահար անել իշխանության աշխատանքը»,- ասել է Յուն Սեոկ Յոլը։