ԱՄՆ-ն նոր պատժամիջոցներ կսահմանի Վրաստանի դեմ. Բլինկեն

ԱՄՆ պետքարտուղար Էնթոնի Բլինկենը քննադատել է վրացական իշխանությունների գործողությունները ցուցարարների նկատմամբ ուժ կիրառելու համար և Թբիլիսիին սպառնացել է ավելի կոշտ պատժամիջոցներով։ Հայտարարությունը հրապարակվել է ԱՄՆ Պետդեպարտամենտի կայքում։

«Միացյալ Նահանգներն այժմ պատրաստվում է օգտագործել իր տրամադրության տակ եղած գործիքները, այդ թվում՝ լրացուցիչ պատժամիջոցները»,- ասվում է հրապարակման մեջ։

Բլինկենն ընդգծել է, որ Վաշինգտոնը դատապարտում է «Վրացական երազանք» կուսակցության գործողությունները եվրաինտեգրման դեմ բողոքող Վրաստանի քաղաքացիների, լրատվամիջոցների ներկայացուցիչների և ընդդիմադիր գործիչների նկատմամբ։

Ավելի վաղ Պետդեպարտամենտը, Եվրամիությանն անդամակցության շուրջ բանակցությունները հետաձգելու և ցուցարարների դեմ ուժի կիրառման վերաբերյալ Թբիլիսիի որոշումից հետո, հայտարարել էր Վրաստանի հետ ԱՄՆ ռազմավարական գործընկերության դադարեցման մասին։