Կառավարությունը մոտ 42 մլն դրամ կհատկացնի ԵԽԽՎ նիստի անցկացման համար

Կառավարությունը 41 471 000 դրամ կհատկացնի Երևանում ԵԽԽՎ իրավական հարցերի և մարդու իրավունքների հանձնաժողովի նիստի անցկացման համար:

Նախագծում մասնավորապես նշվում է.

«ՀՀ Ազգային ժողովի հրավերով սույն թվականի դեկտեմբերի 9-10 Երևանում անցկացվելու է ԵԽԽՎ իրավական հարցերի և մարդու իրավունքների հանձնաժողովի նիստ (մինչև 60 մասնակից)։

Միաժամանակ սույն թվականի դեկտեմբերի 10-12-ը Երևանում անցկացվելու է ՍԾՏՀԽՎ լիագումար նստաշրջան (մինչև 130 մասնակից):

Քանի որ, վերոգրյալ երկու միջոցառումների անցկացման վայրը և ժամկետները վերջնական հաստատվել են 2024 թվականի ընթացքում, այդ միջոցառումների կազմակերպման համար Հայաստանի Հանրապետության Ազգային ժողովի 2024 թվականի բյուջեով համապատասխան ֆինանսական միջոցներ չեն նախատեսվել։

Միջոցառումների պատշաճ  կազմակերպման համար համապատասխան ծառայությունների արժեքը գնահատվել է  41,471․0 հազար դրամ։

Նախագծով առաջարկվում է 2024թ. պետական բյուջեով  Ազգային ժողովի ընդհանուր հատկացումների հաշվին իրականացնել վերաբաշխում և 31001 «ՀՀ Ազգային ժողովի տեխնիկական հագեցվածության բարելավում» միջոցառման 5122 «Վարչական սարքավորումներ» հոդվածի ժամանակավոր ազատ ֆինանսական միջոցներից 34.9մլն դրամը ուղղել վերոգրյալ ծառայությունների ձեռքբերմանը: Միջոցառման անցկացման համար անհրաժեշտ  ֆինանսական միջոցների 6.6 մլն դրամ դեֆիցիտը կծածկվի ներքին հոդվածային վերաբաշխման միջոցով»: