Գիտնականները ստեղծել են առաջին ռոբոտ ագռավը, որը կարողանում է թռչել

Շվեյցարիայից և ԱՄՆ-ից գիտնականները մշակել են յուրահատուկ ռոբոտ՝ «RAVEN» (անգլերենից՝ ագռավ), որն ունակ է սկսել թռիչքը ցատկով, ինչպես դա անում են համանուն թռչունները։ Իր զսպանակավոր ոտքերի շնորհիվ ռոբոտը կարող է նաև քայլել, վազել և ցատկոտել գետնի վրա, ինչը նրան ունիվերսալ է դարձնում տարբեր առաջադրանքների համար: Աշխատանքը հրապարակվել է Nature ամսագրում, գրում է Gazeta.ru–ն։

Գիտնականների կողմից մշակված «RAVEN»-ն ունի ֆիքսված թևեր և V-աձև պոչ, թռիչքն ինքնին իրականացվում է կտուցի փոխարեն դրված օդային պտուտակի միջոցով: Թռիչքն իրականացվում է ցատկով՝ մարմնի առջևի մասում տեղակայված օդային պտուտակի համաժամանակյա գործարկումով: Գիտնականների կարծիքով՝ թռիչքի այս տեսակն ավելի քիչ էներգիա է ծախսում, քան թեւերի օգնությամբ կատարվողը:

Փորձարկումները ցույց են տվել, որ ռոբոտը հաջողությամբ վերարտադրում է թռչունների շարժումները՝ քայլել, վազել և սահուն անցնել ցատկով թռիչքին: Գետնից արագ օդ բարձրանալու ունակությունը խոստումնալից է դարձնում դժվար հասանելի վայրերը ուսումնասիրելու, փրկարարական առաքելությունների և բարդ բնական պայմաններում աշխատելու համար:

RAVEN-ը ապացուցում է, որ բնության և ժամանակակից տեխնոլոգիաների համադրությունը կարող է հանգեցնել ապագայի ռոբոտաշինության համար յուրահատուկ լուծումների։