Հարավային Կորեայի նախագահը ներողություն է խնդրել ռազմական դրություն մտցնելու համար

Հարավային Կորեայի նախագահ Յուն Սեոկ Յոլը ներողություն է խնդրել երկրի քաղաքացիներից ռազմական դրություն մտցնելու համար և ասել, որ իշխող կուսակցությունը կորոշի իր ապագան։ «Ես անկեղծորեն ներողություն եմ խնդրում մեծապես ցնցված քաղաքացիներից: Ես հնարավորություն կտամ մեր կուսակցությանը կայունացնել քաղաքական իրավիճակը` ներառյալ իմ պաշտոնավարման հարցը», - ասել է Յունը հեռուստաուղերձում, փոխանցում է DW-ն:

Յունի հայտարարությունից անմիջապես հետո իշխող «Ժողովրդական ուժ» կուսակցության ղեկավար Հան Դոնգ Հունը նախագահի հրաժարականն անխուսափելի է համարել: «Ներկա պայմաններում նախագահի պարտականությունների բնականոն կատարումն անհնար է»,- պարզաբանել է նա։

Քաղաքացիներին ուղղված իր ուղերձում Յուն Սեոկ Յոլը խոստացել է նաև, որ ռազմական դրություն չի մտցնի։ «Հստակ ասեմ՝ երբեք երկրորդ ռազմական դրություն չի լինի»,- ասել է նախագահը։

Դեկտեմբերի 17-ին Հարավային Կորեայի խորհրդարանը պետք է քվեարկի նախագահի իմփիչմենթի հարցով։ Պետության ղեկավարի պաշտոնից Յունին հեռացնելու որոշում կայացնելու համար ընդդիմությանն անհրաժեշտ կլինի իշխող կուսակցության աջակցությունը։