Զելենսկին հայտնել է Ուկրաինայում ռազմական կորուստների թիվը

Ռուս-ուկրաինական լայնամասշտաբ պատերազմի սկզբից ի վեր սպանվել է 43 000 ուկրաինացի զինվոր։ Այս մասին հայտարարել է Ուկրաինայի նախագահ Վոլոդիմիր Զելենսկին տելեգրամյան իր ալիքում։

«Մեր ժողովուրդն իր կյանքի գնով պաշտպանում է իր տունը, և մեր զինվորների ու մեր խաղաղ բնակիչներից յուրաքանչյուրի կյանքը մեզ համար արժեքավոր է։ Լայնամասշտաբ պատերազմի սկզբից ի վեր Ուկրաինան կորցրել է 43 000 զինվոր, որոնք զոհվել են մարտի դաշտում։ Վիրավորներին օգնություն ցուցաբերելու 370 000 դեպք է գրանցվել, և դա հաշվի առնելով, որ մեր բանակում վիրավորների մոտ 50 տոկոսը վերադառնում է ծառայության, և գրանցվում են բոլոր վնասվածքները, այդ թվում՝ թեթև և կրկնվող»,- ասել է Զելենսկին։

Նա նաև իր գնահատականն է տվել ռուսական կորուստների վերաբերյալ։ Նրա խոսքով՝ Ռուսաստանը կորցրել է 198 000 զոհ, ավելի քան 550 000-ը վիրավորվել է։