Համաշխարհային երգիչները կոմպոզիտոր Շուշան Սարգսյանի «Jamais» երգում՝ նվիրված Շառլ Ազնավուրին (տեսանյութ)

Տեղի է ունեցել մեծն շանսոնյե Շառլ Ազնավուրի 100-ամյակին նվիրված «Jamais» («Երբեք») երգի և տեսահոլովակի փակ նախադիտումը: Այն իրականացվել է մաեստրոյի հոբելյանի շրջանակում՝ Կառավարական հանձնաժողովի որոշմամբ, Կրթության, գիտության, մշակույթի և սպորտի նախարարության և «Հրաչյա Պողոսյան» հիմնադրամի աջակցությամբ:

Երգի խոսքերի հեղինակը Բատիստ Ֆոմերն է, երաժշտության հեղինակը՝ կոմպոզիտոր Շուշան Սարգսյանը: Նախագծում ընդգրկված են 10 հայտնի արտիստներ Ֆրանսիայից և Հայաստանից՝ Հելեն Սեգարա, Ժուլիեն Դասեն, Ջուլիանա Գրիգորյան, Սոնա Ռուբենյան, Գևորգ Հակոբյան, Մաշա Մնջոյան, Աննա Խաչատրյան, Արամ MP3, Հովհաննես Այվազյան և Էրիկ Կարապետյան:

Կոմպոզիտոր Շուշան Սարգսյանը ներկայացրել է երգի ստեղծման պատմությունը՝ նշելով, որ այն գրվել է Շառլ Ազնավուրի մահից մի քանի ամիս անց, երբ կարդացել էր նրա պատմություններից մեկը: «Այդ պատմությունն ինձ խորապես ոգեշնչեց, և ես հասկացա, որ այն կարող է միշտ ոգեշնչման ու չհանձնվելու աղբյուր լինել արվեստագետների համար: Այստեղից էլ ծնվեց «Jamais» երգը»,- ասել է Շուշան Սարգսյանը:

«Ամեն ինչ պետք է լիներ լայն և ընդգրկուն՝ ինչպես Շառլ Ազնավուրի արվեստն ու փիլիսոփայությունը: Այս երգը չէր կարող սահմանափակվել մեկ երգչի կատարմամբ: Այստեղ խտացված է իմ ողջ սերն ու ակնածանքը նրա արվեստի, կերպարի ու մեծության հանդեպ՝ հարգանքի տուրք տալով իրական հայի ազնվագույն տեսակին»,- շեշտեց նա:

Երգի գործիքավորումն իրականացվել է Ֆրանսիայում, իսկ ձայնագրման և նկարահանման աշխատանքները՝ Հայաստանում և Ֆրանսիայում: Պրոֆեսիոնալ մեծ թիմ է աշխատել այս նախագծի վրա:

Նախագիծը շարունակում է հայ-ֆրանսիական համագործակցության բարի ավանդույթները, որի հիմնադիրներից էր նաև մեծ շանսոնյեն:

Երգն արդեն հասանելի է YouTube-ում: