Հնդկաստանը հրաժարվել է զենք վաճառել Ադրբեջանին. ThePrint

Ադրբեջանը երրորդ երկրի միջոցով Հնդկաստանից զենք գնելու ցանկություն է հայտնել, սակայն Նյու Դելին հայտարարել է, որ ինքնուրույն է որոշում իր առաջնահերթությունները և թույլ չի տա երրորդ երկրի միջնորդի դեր խաղալ, գրում է ThePrint-ը՝ հղում անելով աղբյուրներին։

Թերթը չի հստակեցրել, թե որ երկրի մասին է խոսքը։ ԶԼՄ–ի տվյալներով՝ Բաքուն երբեք այս հարցն ուղղակիորեն չի բարձրացրել Հնդկաստանի իշխանությունների առջև։ Փոխարենը երրորդ երկիր դիմել է Հնդկաստանին՝ առաջարկելով արտահանել իր զենքը և երկարաժամկետ գործընկերություն հաստատել Ադրբեջանի հետ։

Բաքուն պատրաստ է պայմաններ առաջարկել, որոնք համեմատելի են այն պայմանագրերի հետ, որոնք Հայաստանը նախկինում կնքել է Հնդկաստանի հետ, ասվում է հրապարակման մեջ։

Այդ կերպ Ադրբեջանի իշխանությունները փորձում են տարածաշրջանում «ուժերի հավասարակշռություն» հաստատել, հավելել է ThePrint-ը։

2022 թվականի սեպտեմբերին Հայաստանը Հնդկաստանի հետ 244 միլիոն դոլարի զենքի գնման պայմանագիր է կնքել։ Հնդկաստանը 2023 թվականի օգոստոսին Հայաստան է մատակարարել 155 մմ տրամաչափի ATAGS հրետանային առաջին վեց համակարգերը, որոնց փորձարկումն ավարտվել է 2024 թվականի հոկտեմբերին։