Բրիտանացի կանիբալները 37 մարդու են կերել

Բրիտանիայում հայտնաբերված 37 բրոնզեդարյան մարդկանց մնացորդները պատկանել են կանիբալների զոհերին։ Այս մասին գրում է Science News-ը։

1970-ականներին և 1980-ականներին հնագետները Չարտերհաուս Ուորենում գտել են մարդկային ոսկորներ՝ 15 մետր խորությամբ փոսում: Այնտեղ եղել են նաև անասունների, ընտանի և վայրի կենդանիների ոսկորներ։ Մի քանի տասնամյակ անց Օքսֆորդի համալսարանի հնագետ Ռիկ Շուլթինգը և նրա գործընկերներն ուսումնասիրել են սարսափելի գտածոները և պարզել, որ զանգվածային գերեզմանը հայտնվել է առնվազն չորս հազար տարի առաջ:

Antiquity ամսագրում հրապարակված հոդվածի համաձայն՝ առնվազն 37 մարդու ոսկորների վրա ատամների հետքեր կան։ Մարդակերները մասնատել են զոհերին, մասամբ կերել, ապա հսկայական փոս են փորել ու մնացորդները թափել այնտեղ։

Գիտնականները ենթադրում են, որ կոտորածը տեղի է ունեցել հարևան համայնքների միջև: Մարդակերները կա՛մ գերի են վերցրել իրենց հարևաններին, կա՛մ սպանել են նրանց անակնկալ հարձակման ժամանակ: Տուժածները գրեթե չեն դիմադրել։ Ինչպես գրում են հնագետները, ամենայն հավանականությամբ, դաժան ջարդը կատարվել է որպես վրեժխնդրություն։ Շուլթինգը նշել է հայտնագործության յուրահատկությունը։ Մինչ այս բրոնզի դարը ավանդաբար համարվում էր բրիտանական պատմության ամենախաղաղ ժամանակաշրջաններից մեկը: