Ռազմական օդաչուն սիրիական բանտից ազատ է արձակվել 43 տարվա ազատազրկումից հետո

Սիրիացի նախկին ռազմական օդաչու Ռահիդ ալ-Թաթարին սիրիական բանտից ազատ է արձակվել 43 տարվա ազատազրկումից հետո, հայտնում է Al Arabia-ն։

Լրատվամիջոցները հղում անելով օգտատերերին, հայտնում են, որ լուսանկարներ են հրապարակվել, թե ինչպես արդեն նախկին բանտարկյանը հանդիպում  իր ընտանիքի հետ` Ասադի ռեժիմի բանտերում 43 տարվա ազատազրկումից հետո։

Ըստ սիրիական լրատվամիջոցների՝ այս օդաչուն ձերբակալվել է 1982 թվականին՝ հրաժարվելով կատարել այդ ժամանակ Սիրիայի նախագահ Հաֆեզ Ասադի հրամանը և ռմբակոծել Սիրիայի Համա քաղաքը՝ ցույցերը ճնշելու համար։ Ալ-Թաթարին ազատ է արձակվել Սիրիայի արևմուտքում գտնվող Տարտուսի բանտից Բաշար ալ-Ասադի վարչակարգի տապալումից հետո։

Թաթարիի ընտանիքից շատերը կորցրել էին նրան կենդանի տեսնելու հույսը: 

Մեկ այլ վարկածով՝ Ռաղիդ Ահմադ ալ-Թաթարիի բանտային ոդիսականը սկսվել է 1982 թվականին, երբ նա 27 տարեկան էր, այն բանից հետո, երբ ընկերակից օդաչուն կործանիչով փախել է Հորդանան:

Ալ-Թաթարին մեղադրվել է իր գործընկերոջ փախուստի ծրագրերի մասին տեղեկությունները թաքցնելու մեջ։ Մեզզե բանտում երկու տարի մենախցում մնալուց հետո նրան տեղափոխել են տխրահռչակ  Պալմիրայի բանտ, որտեղ նա մնացել է մինչև 2000 թվականը։ Դրան հաջորդել է տեղափոխությունը մեկ այլ տխրահռչակ բանտ՝ Սեդնայի, իսկ 2011 թվականին՝ Դամասկոսի Ադրայի կենտրոնական բանտ: Ռազմական դատարանը մեկ րոպեում նրան դատապարտել է ցմահ ազատազրկման։

Ճաղերի հետևում Ալ-Թաթարին զարգացրել է նկարչի և քանդակագործի տաղանդը՝ ստեղծելով փոքրիկ քանդակներ հացի փշրանքներից, շաքարավազից, կիտրոնաթթվից և ձիթապտղի կորիզներից: Նա նաև կազմակերպել է շախմատի մրցաշարեր՝ հացի խմորից կտորներ պատրաստելով և կտորի վրա տախտակը գծելով։