«Չորրորդ ինքնիշխանություն». Զորակոչային խնդիրներ Ղարաբաղում

Թերթը գրում է. «Մինչ Հայաստանում ակտիվորեն քննարկվում են բանակային խնդիրները, պարզվում է՝ նույն խնդիրները կան նաեւ Ղարաբաղում, չնայած դրանք հնարավորինս փորձում են քողարկած պահել։ Մեր տեղեկություններով, օրինակ, անցած տարվա վերջին ձմեռային զորակոչը Ղարաբաղում գրեթե տապալման եզրին է եղել. նախատեսված ժամին գրեթե ոչ ոք չէր ներկայացել զինկոմիսարիատ։ Ըստ մեր տեղեկությունների, այդ փաստն այնքան էր հունից հանել ԼՂՀ նախագահ Բակո Սահակյանին, որ վերջինս նույնիսկ ԱԱԾ աշխատակիցներին էր հրահանգել ողջ Ստեփանակերտով փնտրել, գտնել եւ մեկ տեղում հավաքել բոլոր զինակոչիկներին։ Ըստ մեր տեղեկությունների, երբ Սահակյանը հանդիպել է վերջիններիս հետ եւ փորձել է իմանալ, թե ինչի՞ նրանք չեն ներկայացել զինկոմիսարիատ, ապա բավականին ուշագրավ պատասխաններ է ստացել։ Մասնավորապես, պարզվել է, որ ծանուցագրերից որոշները ուղարկվել են հասցեատերերին առանց ներկայանալու ժամը նշելու։ Իսկ զինակոչիկներից մեկն էլ ուղիղ հայտարարել է, որ ինքը ընտանիքի միակ աշխատողն է, եւ չի պատրաստվում ընտանիքն անհաց թողնել, գնալ ծառայության, իսկ ԼՂՀ ՊԲ հրամանատար Մովսես Հակոբյանի կինն էլ թանկարժեք ավտոմեքենաներ վարի։ Մեր տեղեկություններով, այս հանդիպումից հետո Բակո Սահակյանը իր մոտ է հավաքել բանակի հրամկազմին եւ բացատրություններ պահանջել։ Սակայն, հայտնի պատճառներով Սահակյանին, որը թեեւ ԼՂՀ նախագահն է, բայց այնքան էլ չի վերահսկում բանակը, չի հաջողվել նույնիսկ քննարկումն ավարտին հասցնել։ Ըստ մեր տեղեկությունների, հավաքի կեսից Մովսես Հակոբյանը լքել է դահլիճը՝ նշելով, թե ՀՀ ՊՆախարար Սեյրան Օհանյանն իրեն կանչում է։