Ռուսաստանում միգրացիոն խնդիրը «շատ զգայուն է և սուր»․ Պուտին

ՌԴ նախագահ Վլադիմիր Պուտինը ասուլիսի ժամանակ երկրում միգրացիոն խնդիրն անվանել է «շատ զգայուն և սուր»՝ հավելելով, որ խնդիրները լուծելու համար երկրին անհրաժեշտ է մասնագիտացված հզոր կենտրոն։

«Հարցը ոչ միայն մեզ համար է սուր, այլև ավելի սուր է Եվրոպայի համար»,- ասել է ՌԴ ղեկավարը։

Դրանից ելնելով, նրա խոսքով, անհրաժեշտ է ուժեղացնել միգրացիոն աշխատանքը ՆԳՆ-ի կազմում և ստեղծել առանձին կենտրոն։

«Բազմաթիվ քննարկումներ եղան, թե արդյոք մենք պետք է առանձին վարչություն ստեղծենք, թե այն թողնենք ներքին գործերի նախարարության կազմում։ Կարծում եմ, որ այսօր պետք է ուժեղացնենք այս բաղադրիչը»,- ասել է ՌԴ նախագահը։

Նրա խոսքով, ռուսաստանյան գործարար շրջանակների, նախարարությունների ու գերատեսչությունների ներկայացուցիչներն ասում են, թե քանի ձեռք է պակասում շինարարության ոլորտում, քանիսը` արդյունաբերության մեջ։ Թիվը հասնում է 100 000-ի:

«Դրա համար կառավարությունը պետք է ավելի մեծ ուշադրություն դարձնի նման հարցերին: Միգրանտների հետ կապված խնդիրները լուծելու համար անհրաժեշտ է բարձրացնել աշխատանքի արտադրողականությունը և աշխատել հարևան երկրների հետ՝ զարգացնելու ռուսական դպրոցների ցանցը Կենտրոնական Ասիայի երկրներում, Ռուսաստանի Դաշնությունում աշխատելու պատրաստվող մարդկանց ծանոթացնել ավանդույթներին, մշակույթին, ինչպես նաև խստացնել Ռուսաստանի օրենսդրության պահանջները:

Պուտինը նաև պաշտպանել է միգրանտ երեխաներին առանց ռուսերենի իմացության դպրոցներ ընդունելու արգելքը։

«Ընդհանուր առմամբ, դա հասկանալի է. ինչպե՞ս կարող ես երեխային սովորեցնել դպրոցում, եթե նա չի խոսում այդ լեզվով։ Պետք է նրան առանձին սովորեցնել ռուսերեն։ Ո՞վ է վճարելու դրա համար»,- ասել է Պուտինը։

«Իրավապահները պետք է ապահովեն, որ միգրանտները հարգեն Ռուսաստանի ավանդույթները։ Իսկ դրանց թիվը նվազեցնելու համար անհրաժեշտ է բարձրացնել աշխատանքի արտադրողականությունը»,-հավելել է Պուտինը։