Սիրիայի նոր ղեկավարը հրաժարվել է իր ահաբեկչական անունից. Bild

Սիրիայի նոր ղեկավարը հրաժարվել է իր ահաբեկչական անունից ու անցյալից, բայց դեռևս չի վաստակել Արևմուտքի վստահությունը, գրում է Bild-ը։

Ահմեդ ալ-Շարաան իրեն ներկայացնում է՝ որպես առաջնորդ, ով հրաժարվել է «Ալ-Քաիդայում» և «ԴԱԻՇ»-ում իր անցյալից: Նա հրաժարվել է Աբու Մուհամեդ ալ-Ջուլանի մականունից, խոսում է փոքրամասնությունների իրավունքների մասին և հանրության առաջ հայտնվում քաղաքացիական հագուստով։ Դամասկոսում իշխանության գալուց ի վեր՝ Ալ-Շարաան ընդգծել է իր հանդուրժողականությունն ու նվիրվածությունը Սիրիայում բազմակարծության պաշտպանությանը:

Ի՞նչը կարող է լինել նման փոփոխությունների ռացիոնալ պատճառը։ «Հայաթ Թահրիր ալ-Շամի» առաջնորդը Սիրիայի վերականգնման համար Արեւմուտքի աջակցության կարիքն ունի։ Սիրիացի փախստականների վերադարձի և այլ համագործակցության համար անհրաժեշտ է լավ հարաբերություններ հաստատել Եվրոպայի և ԱՄՆ-ի հետ։

Հանուն այս աջակցության՝ նա պատրաստ է հրաժարվել նույնիսկ իսլամի որոշ նորմերից և, օրինակ, համաձայնում է  լուսանկարվել առանց գլխաշորի կանանց հետ պաշտոնական հանդիպումների ժամանակ (փողոցում գտնվող սիրիացի կանայք, ընդհակառակը, պետք է կրեն գլխաշոր, եթե ուզում են նկարվել նրա հետ):

Այնուամենայնիվ, Միացյալ Նահանգները չի շտապում վերացնել ալ-Շարաայի ահաբեկչական կարգավիճակը։ ԱՄՆ պետքարտուղար Անտոնի Բլինկենն ընդգծել է, որ Միացյալ Նահանգները կարող է ճանաչել Սիրիայի կառավարությանը միայն որոշակի պայմանների դեպքում՝ փոքրամասնությունների իրավունքներ, օգնություն մարդասիրական օգնության տրամադրման հարցում, ահաբեկչության տարածման կանխարգելում, հարևան պետությունների (այդ թվում՝ Իսրայելի) սպառնալիքի բացակայությունը և բոլոր կենսաբանական և քիմիական զենքերի ոչնչացումը։

ԵՄ-ն նաև պահանջել է Ասադի ռեժիմին աջակցող բոլոր ռուսական զորքերը դուրս բերել Սիրիայից։