Գերմանիայում ավտոմեքենան մխրճվել է սուրբծննդյան տոնավաճառի մեջ. կան զոհեր (լուսանկարներ)

Գերմանիայի արևելյան Մագդեբուրգ քաղաքում սուրբծննդյան տոնավաճառում ավտոմեքենան վրաերթի է ենթարկել մարդկանց։ 11 մարդ զոհվել է, վիրավորվել է 80 մարդ։  Ըստ նախնական վարկածի՝ դա դիտավորություն է եղել։ Հարձակում գործողը բերման է ենթարկվել։ Նրա հարձակման դրդապատճառները հայտնի չեն, գրում է Bild-ը։

Սաքսոնիա-Անհալթ նահանգի կառավարության ղեկավար Ռայներ Հասելոֆի խոսքով՝ վրաերթի մեջ կասկածվողը 50-ամյա տղամարդ է Սաուդյան Արաբիայից՝ հոգեբույժ։ Նա 2006 թվականին եկել է Գերմանիա՝ սովորելու, իսկ հետո ճանաչվել է՝ որպես փախստական։ Նա երկրում մշտական ​​բնակության թույլտվություն ունի։

Ըստ AFP-ի՝ ավտոմեքենան, որը, ենթադրաբար, սև BMW մակնիշի է, մեծ արագությամբ մխրճվել է ամբոխի մեջ և անցել դրա միջով մոտ 400 մետր: Ավտոմեքենան, հավանաբար, վարձակալված է եղել։

Իրավապահները կարծում են, որ վրաերթը կանխամտածված է եղել, և կասկածյալը գործել է միայնակ։ Ավտոմեքենայում պայթուցիկ չի հայտնաբերվել։ Ելնելով դրանից՝ քննիչները կարծում են, որ կասկածյալին ձերբակալելուց հետո Մագդեբուրգի բնակիչներին այլևս վտանգ չի սպառնում, սակայն դեպքի վայրը շաբաթ վաղ առավոտյան դեռևս շրջափակված է։