ԱՄՆ ռազմածովային ուժերի հածանավը սխալմամբ խոցել է ամերիկյան կործանիչը

ԱՄՆ ռազմածովային ուժերի USS Gettysburg հրթիռային հածանավը Կարմիր ծովում սխալմամբ խոցել է F/A-18 կործանիչը։ Երկու օդաչուներն էլ ողջ են մնացել, հայտնում է ABC News-ը՝ հղում անելով ամերիկյան հրամանատարությանը։

Ведомости–ի փոխանցմամբ՝ «բարեկամական կրակի» պատճառները դեռևս պարզ չեն. հածանավը, հավանաբար, շփոթել է F/A-ն թշնամու ինքնաթիռի կամ հրթիռի հետ։

Նշվում է, որ ավելի վաղ ԱՄՆ զինվորականները հայտնել էին Եմենի հութիների խոցված անօդաչու թռչող սարքերի և հրթիռների մասին, որոնք գրոհել էին ռազմանավերը, և այդ պատճառով էլ Gettysburg–ի անձնակազմը, հավանաբար, «մի քանի վայրկյան» է ունեցել որոշում կայացնելու համար:

ԱՄՆ ռազմածովային ուժերը Կարմիր ծովում ուժեղացրել են հարվածները հութիների դեմ՝ մի քանի օր առաջ տարածաշրջանում USS Truman-ի վերատեղակայումից հետո, նշում է ABC-ն։ Այսպես, դեկտեմբերի 22-ի գիշերը ամերիկյան ռազմական ինքնաթիռները ավիահարվածներ են հասցրել Եմենի մայրաքաղաք Սանային։ Միևնույն ժամանակ, ակնկալվում է, որ ռազմական ներկայության ընդլայնումը կարող է հրահրել հութիներին նոր հարձակումներ իրականացնել ամերիկյան նավերի վրա։