Կրեմլն արձագանքել է ռուսական ակտիվներից Ուկրաինային 1 միլիարդ դոլար փոխանցելուն

Կրեմլի պաշտոնական ներկայացուցիչ Դմիտրի Պեսկովը ճեպազրույցի ժամանակ մեկնաբանել է Կիևի կողմից Ռուսաստանի Դաշնության սառեցված ակտիվներից ստացված եկամուտներով ապահովված առաջին տրանշի ստացումը։

Լրագրողի այն հարցին, թե արդյոք այդ գումարն անդառնալիորեն կորել է Ռուսաստանի համար, Պեսկովը պատասխանել է, որ այդ գումարները գողացել են Ռուսաստանից։

«Այս գումարը մեզնից գողացել են։ Նման անօրինական գործողությունները, այդ թվում՝ այս գումարի փոխանցումը իհարկե կարող են քրեական հետապնդման առիթ դառնալ։ Մենք կօգտագործենք բոլոր հնարավորությունները՝ պաշտպանելու մեր իրավունքները և մեր ունեցվածքը»,-ասել է Պեսկովը։

Դեկտեմբերի 24-ին Ուկրաինայի վարչապետ Դենիս Շմիգալը հայտարարել է, որ Կիևը ստացել է առաջին միջոցները սառեցված ռուսական ակտիվներից։ Նրա խոսքով, սա ծրագրված 20 միլիարդ դոլարի առաջին մասնաբաժինն է։ Խոսքը 1 միլիարդ դոլարի մասին է։