Մեդվեդևը կոչ է արել Հարավային Կորեային «Կաղամարների խաղ» կազմակերպել պաշտոնյաների համար

ՌԴ Անվտանգության խորհրդի փոխնախագահ Դմիտրի Մեդվեդևն առաջարկել է Հարավային Կորեայի կառավարության համար «Կաղամարների խաղ» կազմակերպել։ Նա համապատասխան բովանդակությամբ գրառում է հրապարակել X-ի իր միկրոբլոգում։

Պետական ​​գործիչը մեկնաբանել է Հարավային Կորեայի խորհրդարանի նախագահ Վու Վոն Սիկի հայտարարությունը, թե պատգամավորները դեկտեմբերի 27-ին կայացած հանդիպման ժամանակ աջակցել են հանրապետության ժամանակավոր նախագահ Հան Դուկ Սուին իմփիչմենթի ենթարկելու առաջարկին։ Նրա խոսքով, համապատասխան նախաձեռնությանը «կողմ» է քվեարկել 300 օրենսդիրներից 192-ը։

«Հարավային Կորեան նորից իր տարերքի մեջ է։ Մի իմփիչմենթը հաջորդում է մյուսին: Կարող է նաև կառավարության համար «կաղամարների խաղ» սկսել: Մեր ադիբուդին պատրաստ է», - գրել է Մեդվեդևը։

«Կաղամարների խաղը» (The Squid Game) հարավկորեական հայտնի հեռուստասերիալ է։ Գլխավոր հերոսները մարդիկ են, ովքեր ֆինանսական դժվարություններ են ապրում և մասնակցում են գոյատևման խաղերին՝ հանուն մեծ դրամական մրցանակի։

Դեկտեմբերի 3-ին Հարավային Կորեայի այն ժամանակվա նախագահ Յուն Սեոկ Յոլը երկրում ռազմական դրություն հայտարարեց։ Մի քանի ժամվա ընթացքում հանրապետության խորհրդարանը քվեարկեց հատուկ ռեժիմը վերացնելու օգտին։

Դեկտեմբերի 14-ին օրենսդիրները՝ 204 պատգամավոր, կողմ են արտահայտվել պետության ղեկավարի իմփիչմենթին։ Արդյունքում՝ Հան Դուկ Սուն, ով զբաղեցնում է նաև վարչապետի պաշտոնը, դարձել է Հարավային Կորեայի ժամանակավոր ղեկավար։