Թուրք մտավորականը Հայոց ցեղասպանությունը ճանաչելու կոչ է անում

Այս պահին ազատազրկման մեջ գտնվող թուրք հայտնի մտավորական, իրավապաշտպան, «Բելգե» հրատարակչության տնօրեն, Հայոց ցեղասպանության մասին բազմաթիվ գրքեր հրատարակած Ռագըփ Զարաքոլուն Հայոց ցեղասպանությունը ճանաչելու կոչ է արել Թուրքիայի խորհրդարանին։

Զարաքոլուն այդ կոչը պարունակող նամակը Թուրքիայի խորհրդարանի նախագահությանն է փոխացել իր փաստաբանի միջոցով։ Այդ նամակում մտավորականը նաև շեշտել է, որ գրեթե հարյուր տարի է անցել Հայոց ցեղասպանությունից, և այդ իրականության պայմաններում Թուրքիայի իշխանությունների ժխտողական վերաբերմունքը կարծես նշանակում է, որ եթե պետք լինի, էլի նման բան կանեն։

Զարաքոլուն կարծում է, որ Թուրքիան պետք է դեմառդեմ կանգնի սեփական պատմության հետ։ 

«Դա ոչ միայն մեր պարտքն է զոհերի առաջ, այլև պարտադիր է թուրք հասարակության առողջ մտքի համար։ Շատ կարևոր է հիմնարար ներողություն խնդրել 1915 թ. համար, և այդ պատասխանատու քայլը պետք է Թուրքիայի խորհրդարանն անի։ Այդ ներողությունը ավելի կբարձրացնի Թուրքիային. դա ստորացում չի լինի։ Հայոց ցեղասպանության 100-ամյակին ընդառաջ Թուրքիան պետք է ներողություն խնդրի և´ նահատակվածներից, և´ սեփական քաղաքացիներից»,-նամակում գրում է Զարաքոլուն։ 

Թուրք մտավորականն այժմ ձերբակալված է ՔԲԿ-ի (PKK) անդամների հետ կապեր ունենալու մեղադրանքով։