Թրամփի` Գրենլանդիայի մասին հայտարարությունները տագնապ են առաջացրել Եվրոպայում․ Bild

ԱՄՆ նորընտիր նախագահ Դոնալդ Թրամփի՝ Գրենլանդիայի վերաբերյալ հայտարարությունները լուրջ անհանգստություն են առաջացրել Եվրոպայում։ Այս մասին հայտնում է Bild-ը։

Նրա խոսքով, հենց դա է դրդել Գերմանիայի կանցլեր Օլաֆ Շոլցին հատուկ հայտարարությամբ հանդես գալ մամուլի համար և հրապարակայնորեն հիշեցնել ԱՄՆ-ին սահմանների անձեռնմխելիության սկզբունքը հարգելու անհրաժեշտության մասին։ Գերմանիայի կառավարության ղեկավարը հեռախոսազրույց է ունեցել Դանիայի վարչապետ Մետե Ֆրեդերիկսենի և ՆԱՏՕ-ի գլխավոր քարտուղար Մարկ Ռյուտեի հետ։ Թրամփի հայտարարությունները կանցլերը քննարկել է Ֆրանսիայի նախագահ Էմանուել Մակրոնի հետ SMS-ի միջոցով, գրում է Bild-ը։

Չորեքշաբթի ավելի վաղ Շոլցն ասել էր, որ եվրոպացի առաջնորդները չեն հասկանում Թրամփի վերջին մեկնաբանությունները: Գերմանիայի կառավարության ղեկավարի խոսքով՝ «սահմանների անձեռնմխելիության սկզբունքը վերաբերում է բոլոր երկրներին»։

Երեքշաբթի օրը, Ֆլորիդայի Մար-ա-Լագոյի իր կալվածքում լրագրողների հետ զրույցում Թրամփը հրաժարվեց երաշխավորել, որ չի դիմի ուժի կամ տնտեսական պարտադրանքի՝ Պանամայի ջրանցքի և Գրենլանդիայի խնդիրները լուծելու համար: Նա նախկինում հայտարարել էր, որ ԱՄՆ-ին անհրաժեշտ է վերականգնել վերահսկողությունը Պանամայի ջրանցքի նկատմամբ, ինչպես նաև խոսել է Գրենլանդիայի՝ Դանիայի կազմում ինքնավար շրջանի, ԱՄՆ-ին միանալու մասին: