Դանիային զգուշացրել են՝ Թրամփի՝ Գրենլանդիան գնելու մտադրությունները լուրջ են

ԱՄՆ նորընտիր նախագահ Դոնալդ Թրամփի խորհրդականները նախազգուշացրել են դանիացի պաշտոնյաներին Գրենլանդիայի գնման հետ կապված «նրա մտադրությունների լրջության մասին»։ Այս մասին հայտնում է CNN-ը։

Հեռուստաալիքի տվյալներով՝ թագավորությունը ներկայումս ուշադիր կշռում է՝ ինչպես արձագանքել հանրապետականի գաղափարին, որպեսզի այն չհանգեցնի ԱՄՆ-ի հետ հարաբերությունների խզման։

CNN-ի՝ Կոպենհագենի և Վաշինգտոնի աղբյուրները հայտնել են, որ իրենք չեն հասկանում Թրամփի՝ Գրենլանդիայի նկատմամբ վերահսկողություն ձեռք բերելու մոլուցքը, քանի որ ամերիկյան կողմն արդեն 10-ամյա պաշտպանական պայմանագիր ունի կղզու հետ: Այս համաձայնագիրը օգնել է մի քանի անգամ մեծացնել այնտեղ ամերիկյան ռազմական ներկայությունը։

Պենտագոնի անանուն պաշտոնյան ասել է հեռուստաալիքին, որ Գրենլանդիայի վերաբերյալ մտահոգությունները կապված են Դանիայից անկախանալու հնարավորության հետ, ինչը կդարձնի կղզին քաղաքականապես ավելի անկայուն և ավելի խոցելի Ռուսաստանի և Չինաստանի ազդեցության համար: