«ԱՄՆ-ն չի ցանկանում տեսնել, որ Թուրքիան ռազմական գործողություններ է սկսել Սիրիայում քրդերի դեմ»․ Բլինկեն

ԱՄՆ վարչակազմը չէր ցանկանա տեսնել Թուրքիայի կողմից Սիրիայում քրդական զինված խմբավորումների դեմ լայնածավալ ռազմական գործողություն և փորձում է կանխել իրադարձությունների նման զարգացումը։ Այդ մասին հայտարարել է ԱՄՆ պետքարտուղար Անտոնի Բլինկենը՝ Փարիզում կայացած բանակցություններից հետո Ֆրանսիայի արտգործնախարար Ժան-Նոել Բարոյի հետ համատեղ մամուլի ասուլիսում, գրում է ՏԱՍՍ-ը։

Նա նշել է, որ ԱՄՆ-ն շատ սերտորեն աշխատում է Թուրքիայի հետ՝ լուծելու Քրդստանի աշխատավորական կուսակցության վերաբերյալ նրա մտահոգությունները։

«Դա մի գործընթաց է, որը որոշակի ժամանակ կպահանջի: Միևնույն ժամանակ, այն, ինչ իրականում չի բխի Սիրիայում տեղի ունեցող դրական իրադարձությունների շահերից, հակամարտությունն է: Մենք շատ ենք աշխատել, որպեսզի դա տեղի չունենա: Եվ մենք կշարունակենք դա անել:» հավելել է նա։