Ատոմակայանի 2-րդ էներգաբլոկի աշխատանքի երկարացման համար հատկացրել ենք 160 մլն դոլար․ ՏԿԵ նախարար

Հայկական ԱԷԿ-ի շահագործման ժամկետի երկրորդային երկարացման նախագծի իրականացման աշխատանքները հաջողությամբ իրականացվում են։ Այս մասին 2024թ. արդյունքներն ամփոփող մամուլի ասուլիսում հունվարի 9-ին ասել է տարածքային կառավարման եւ ենթակառուցվածքերի նախարար Դավիթ Խուդաթյանը։

Նա տեղեկացրել է, որ այդ նպատակների համար նախատեսվում է հատկացնել 165 մլն դոլար։ Պաշտոնյան պարզաբանել է, որ կառավարությունը տարբերակներ է քննարկում, եւ հաշվի են առնվելու թե՛ ֆինանսական, թե՛ տնտեսական հանգամանքները, ինչպես նաեւ այն ժամկետը, որի ընթացքում հնարավոր կլինի ատոմակայանը շահագործման մեջ մտցնել։ Նա հիշեցրել է, որ ստեղծվել է նոր կազմակերպություն, որը կուսումնասիրի հայտերը, վերջնական տեսքի կբերի ատոմակայանի մոդելը եւ կվերահսկի շինարարական աշխատանքները։ «Մենք քննարկում ենք ոչ միայն ռուսական եւ ամերիկյան, այլ նաեւ այլ առաջարկներ, սակայն վերջնական որոշում առայժմ չկա»,- ավելացրել է Խուդաթյանը։

Նրա տվյալներով՝ 2024թ. Հայաստանում արտադրվել է 8,9 մլրդ կՎտ/ժ էլեկտրաէներգիա, որից 1,5 մլրդ կՎտ/ժ-ն արտահանվել է։ Նա ընդգծել է, որ նախորդ տարի հանրապետություն է ներկրվել 145 մլն կՎտ/ժամ էլեկտրաէներգիա։

Դավիթ Խուդաթյանը նշել է, որ 2024թ. դեկտեմբերի 25-ի դրությամբ Հայաստանի օդանավակայանները սպասարկել են ավելի քան 5,2 մլն ուղեւորի եւ 41,4 տոննա բեռ։ «Անցյալ տարի շուկան համալրվել է եւս հինգ նոր ավիափոխադրողներով»,- նշել է նա։ Նախարարը հայտնել է, որ Կապան-Երեւան-Կապան երթուղով իրականացվել է 75 ավիաչվերթ։