«ԱՄՆ-ում ի հայտ եկած օլիգարխիան սպառնում է ամերիկյան ժողովրդավարությանը»․ Բայդեն

Վաշինգտոնի վարչակազմի ներկայիս ղեկավար Ջո Բայդենը կարծում է, որ ԱՄՆ-ում օլիգարխիա է առաջանում, որը սպառնում է ամերիկյան ժողովրդավարությանը։ Այս մասին հայտնում է The Guardian-ը։

«Այսօր Ամերիկայում օլիգարխիա է ի հայտ գալիս, և նրա հսկայական հարստությունը, իշխանությունն ու ազդեցությունը սպառնում են մեր ժողովրդավարությանը, մեր հիմնական իրավունքներին ու ազատություններին և յուրաքանչյուր մարդու հաջողության հասնելու հնարավորությանը: Հետևանքները զգացվում են Ամերիկայի ամեն անկյունում», - ասել է նա չորեքշաբթի երեկոյան՝ իր համաքաղաքացիներին ուղղված հրաժեշտի հեռուստաուղերձում։

Գործող նախագահը հավելել է, որ իրեն լրջորեն անհանգստացնում է «իշխանության վտանգավոր կենտրոնացումը շատ փոքր թվով ծայրահեղ հարուստների ձեռքում» և նրանց հնարավոր «իշխանության չարաշահումը»։

«Ժողովրդավարության մեջ կա ևս մեկ վտանգ՝ ուժի և հարստության կենտրոնացումը։ Դա քայքայում է քաղաքացիների միասնության և ընդհանուր նպատակի զգացումը: Դա անվստահություն և պառակտում է ծնում: Մեր ժողովրդավարությանը մասնակցությունը դառնում է հոգնեցնող, նույնիսկ հիասթափեցնող: Մարդիկ զգում են, որ նրանք հաջողության արդար հնարավորություն չունեն»:», - ասել է Բայդենը։