Կանադան պատրաստվում է 105 մլրդ դոլարի մաքսատուրքեր սահմանել ամերիկյան ապրանքների վրա․ Bloomberg

Կանադան ցուցակագրել է 150 միլիարդ կանադական դոլարի (105 միլիարդ ԱՄՆ դոլարի) ամերիկյան արտադրության ապրանքներ, որոնք մաքսատուրքերի տակ կհայտնվեն, եթե ԱՄՆ նորընտիր նախագահ Դոնալդ Թրամփը որոշի մաքսատուրքեր սահմանել կանադական ապրանքների վրա: Այս մասին գրում է Bloomberg-ը։

Աղբյուրի փոխանցմամբ՝ ցուցակը նախագիծ է և ուժի մեջ կմտնի միայն այն դեպքում, եթե Թրամփի վարչակազմը կատարի առաջին քայլերը։ Այս նախնական ցուցակի տարրերը չեն բացահայտվում:

Երբ Թրամփը 2018-ին մաքսատուրքեր սահմանեց կանադական պողպատի և ալյումինի վրա, Կանադան արձագանքեց՝ մաքսատուրքեր սահմանելով ամերիկյան արտադրության մի շարք ապրանքների վրա, ինչպիսիք են վիսկին և լվացքի մեքենաները: Այս սակագներն իրենց մասշտաբով շատ ավելի փոքր են եղել:

Թրամփը 2024 թվականի նոյեմբերի վերջին հայտարարեց, որ Միացյալ Նահանգները 25% մաքսատուրք կսահմանի Մեքսիկայից և Կանադայից ապրանքների համար և 10% մաքսատուրք չինական ապրանքների համար։ Նա խոստացել է անհրաժեշտ փաստաթղթերը ստորագրել հունվարի 20-ին՝ երդմնակալությունից անմիջապես հետո։ Նրա խոսքով, մաքսատուրքերը կգործեն այնքան ժամանակ, քանի դեռ թմրանյութերն այլևս չեն ներմուծվել ԱՄՆ և դադարել ապօրինի ներգաղթյալների հոսքը։ Դեկտեմբերի վերջին Թրամփը բացատրել էր, որ եթե Կանադան դառնա ԱՄՆ 51-րդ նահանգը, նրա բնակիչների համար հարկերը կկրճատվեն ավելի քան 60%-ով։