Հարրիսը հիասթափված է Բայդենից․ WSJ

ԱՄՆ փոխնախագահ Քամալա Հարիսը հիասթափված է ամերիկյան պետության ներկայիս ղեկավար Ջո Բայդենի խոսքերից, թե նրա փոխարեն ինքը կհաղթեր վերջերս կայացած նախագահական ընտրություններում։ Այս մասին գրում է The Wall Street Journal-ը։

«Հարիսն ասել է մերձավոր դաշնակիցներին և ընտանիքի անդամներին, որ հիասթափված է նախագահ Բայդենի վերջին հայտարարությունից, թե նա կհաղթեր 2024 թվականի ընտրություններում», - ասվում է հրապարակման մեջ:

Հրապարակումը, վկայակոչելով խոսակցություններին ծանոթ մարդկանց, պնդում է, որ ԱՄՆ ներկայիս նախագահի հայտարարությունը բարդացրել է Սպիտակ տանը քաղաքական գործիչների հարաբերությունները վերջին օրերի ընթացքում։

WSJ-ը նաև մեջբերում է Բայդենի հայտարարությունները ընտրություններում հաղթելու իր կարողության մասին, եթե նա դուրս չգա ընտրապայքարից: Ի թիվս այլ բաների՝ ամերիկացի նախագահն ասել է, որ ձայների քանակով կարող էր առաջ անցնել նորընտիր նախագահ Դոնալդ Թրամփից՝ հաստատելով իր խոսքերը հարցումների տվյալներով։