Շարունակվում են ԱԱԽ քարտուղար Արթուր Բաղդասարյանի հանդիպումները Բելառուսի Հանրապետությունում

ԱԱԽ քարտուղար Արթուր Բաղդասարյանի գլխավորած պատվիրակությունը ժամանել է Մինսկ: Արթուր Բաղդասարյանի և իր գործընկերոջ՝ Բելառուսի Հանրապետության Անվտանգության խորհրդի պետական քարտուղար Լեոնիդ Մալցևի՝ օդանավակայանում տեղի ունեցած առանձնազրույցից հետո շարունակվել են ԱԱԽ քարտուղարի գլխավորած պատվիրակության պաշտոնական հանդիպումները:

Այցի շրջանակներում Արթուր Բաղդասարյանը հանդիպել է Բելառուսի Հանրապետության Գյուղատնտեսության և պարենամթերքի նախարար Միխայիլ Ռուսիի հետ: Հանդիպման ընթացքում քննարկվել են երկու երկրներում պարենային անվտանգության ապահովմանը, ինչպես նաև գյուղատնտեսության ոլորտում երկկողմ համագործակցությանն առանչվող հարցեր: Ընդգծվել է այս ոլորտում փորձի փոխանակման անհրաժեշտությունը, և նախանշվել են հետագա համագործակցության հիմնական ուղղությունները, որոնց կենսագործմանն ուղղված հետագա քայլերի իրականացման նպատակով սույն թվականի փետրվար-մարտ ամիսներին Միխայիլ Ռուսիի գլխավորած պատվիրակությունը կայցելի Հայաստան:

Այնուհետև ԱԱԽ քարտուղար Արթուր Բաղդասարյանի գլխավորած պատվիրակությունը Բելառուսի Հանրապետության Արդյունաբերության առաջին փոխնախարար Իվան Դեմոդևիչի ուղեկցությամբ այցելել է "Մինսկի տրակտորների գործարան" և ծանոթացել ձեռնարկության հզորությունների հետ: Այցի ընթացքում կողմերը քննարկել են Հայաստանում բելառուսական տրակտորների սպասարկման կենտրոնների ստեղծմանն առնչվող հարցեր:

Այցի շրջանակներում ԱԱԽ քարտուղար Արթուր Բաղդասարյանը հանդիպել է նաև Բելառուսի Հանրապետության պաշտպանության նախարար Յուրի Ժադոբինի հետ, որի ընթացքում քննարկվել են պաշտպանության ոլորտում հայ-բելառուսական կապերի խորացմանն առանչվող հարցերի լայն շրջանակ:

Նախատեսվում է ԱԱԽ քարտուղար Արթուր Բաղդասարյանի հանդիպումը Բելառուսի Հանրապետության Նախագահ Ալեքսանդր Լուկոշենկոյի հետ, ինչպես նաև կստորագրվի Հայաստանի Հանրապետության Ազգային անվտանգության խորհրդի աշխատակազմի և Բելառուսի Հանրապետության Անվտանգության խորհրդի պետական քարտուղարության միջև 2012-2013թթ. համագործակցության ծրագիրը: