Թրամփի անակնկալ որոշումը՝ տեղափոխել երդման արարողությունը, խառնել է բոլոր ծրագրերը

ԱՄՆ նորընտիր նախագահ Դոնալդ Թրամփի որոշումը՝ հունվարի 20-ին երդման արարողությունը տեղափոխել Կապիտոլիումի ռոտոնդա՝ Վաշինգտոնում ցրտաշունչ ջերմաստիճանի պատճառով, անակնկալ էր երդմնակալության կազմակերպիչների, միջոցառման հյուրերի և իրավապահ մարմինների համար: Այս մասին հայտնում է The Washington Post թերթը։

Թրամփի որոշումը «ստիպել է հարյուր հազարավոր մարդկանց, ովքեր ամիսներ շարունակ նախապատրաստվել են երկրի 47-րդ նախագահի երդմնակալությանը», փոխել իրենց ծրագրերը։

Այսպիսով, իրավապահներն արդեն շտապ խորհրդակցություններ են հրավիրել։ ԱՄՆ Կոնգրեսի անդամները երդման վայրի տեղափոխման մասին իմացել են լրատվամիջոցներից և ստիպված են եղել պատասխանել Թրամփի երդմնակալությանը նվիրված «հարյուրավոր շփոթված ընտրողների հարցերին, ովքեր գնել են միջոցառումների տոմսեր»։ Կապիտոլիումի աշխատակիցները նույնպես սկսել են շտապել նոր ամբիոն կառուցելու համար, որտեղ Թրամփը կատարելու է պաշտոնի երդումը:

Միաժամանակ, ցուցարարները, ովքեր դեմ են միգրանտների նկատմամբ Թրամփի հնարավոր քաղաքականությանը, արդեն հայտարարել են, որ ցածր ջերմաստիճանը պատճառ չի հանդիսանա բողոքի ցույցերը չեղարկելու համար։ «Սա առաջին անգամը չէ, որ նման բան է տեղի ունենում, երբ կառավարությունը մտնում է շրջափակման մեջ կամ չեղարկում միջոցառումները, իսկ առաջադեմ շարժումը մնում է դրսում», - մեջբերում է հրատարակությունը դժգոհ մարդկանցից մեկի խոսքերը։